Sərhədlərin delimitasiyası işlərinə BAŞLANILDI EKSKLÜZİV

Aprelin 23-də Ermənistan Tavuş vilayətinin Bağanis-Əskipara (Voskepar) istiqamətində Azərbaycanla sərhədlərin delimitasiyası işlərinə başladı.
ULUSUM.az xəbər verir ki, bu barədə Ermənistan Daxili İşlər Nazirliyindən məlumat verib. Bildirilib ki, ərazidə aparılan minalardan təmizləmə işləri və vətəndaşların təhlükəsizliyini təmin etmək məqsədilə yaxınlıqdakı minalanmış ərazilərə daxil olmalarının qarşısını almaq üçün Bağanis-Əskipara avtomobil yolu bağlanıb.
Görünən budur ki, Qazaxın 4 kəndi ilə bağlı gərginlik yaşanır. Erməni öz xislətindən əl çəkmir. Bu gedişlərin sonu necə nəticələnə bilər?
Ulusum.az-a xüsusi olaraq açıqlama verən politoloq Yusif Bağırzadə Qazaxın dörd kəndi ilə bağlı yaşanan gərginliyin arxasında Ermənistan müxalifətinin dayandığını bildirib:

“Hər fürsətdə Paşinyanın mövqelərinin zəiflədilməsinə çalışan bu qüvvələr sərhədlərin delimitasiya prossesinə başlanılmasını və bu fonda ayrı-ayrı ölkələrdən gələn müsbət mövqeni həzm edə bilmədikləri üçün əhalini qızışdırmağa və etirazları böyütməyə çalışırlar. Bu etirazların artıq imzalanmış öhdəliklərinin yerinə yetirilməsinə təsir göstərməyəcəyi qənaətindəyəm. Əvvəla ona görə ki, etirazlarda iştirak edən insanlar da həmin kəndlərin onlara aid olmadıqlarını yaxşı bilirlər və indi bütün etirazları ayrı yerə köçürülmə zamanı Ermənistan hakmiyyətindən maksimum çox şey əldə etməyə hesablanıb. İkincisi, bu gün Paşinyan hakimiyyətinin mövqeyi hələ ki, güclüdür və bu fonda müxalifətin böyük aksiyalar keçirərək hakimiyyət üzərinə götürdüyü öhdəlikərdən imtina etməyə məcbur edəcək qədər qüvvəsi yoxdur".
Politoloq həmçinin bildirir ki,ortada imzalanmış sənəd var və Paşinyan hakimiyyəti də həmin razılaşmaya uyğun olaraq üzərinə götürdüyü vəzifələri icra etməlidir.
"Əgər Ermənistan hakimiyyəti acizlik nümayiş etdirərsə və ya bu etirazları əsas gətirərək prosesi uzatmağa səylər göstərərsə, o zaman biz bütün dünya tərəfindən Azərbaycan ərazisi olaraq qəbul edilmiş kəndlərimizi həmin o “etirazçılardan” qısa vaxt ərzində təmizləyə bilərik", - deyə vurğulayan Yusif Bağırzadə bu baxımdan hansısa xoşagəlməz sürprizlərin olacağına inanmadığını deyir. Politoloq bir daha vurğulayıb ki, konkret müddət var və o müddət ərzində də sözügedən kəndlərin azad olunması təmin ediləcək.

Qeyd edək ki, Ermənistan Tavuş vilayətinin Bağanis-Əskipara (Voskepar) istiqamətində Azərbaycanla sərhədlərin delimitasiyası işlərinə başlanılıb.
Ağa Dadaşzadə