Rəisinin düşdüyü qəza hadisədir, yoxsa...? Eksklüziv

İran prezidenti İbrahim Rəisinin olduğu helikopterin qəzaya düşməsi hazırda bütün dünyanın diqqətindədir. ABŞ-dan tutmuş Avropa İttifaqına kimi bütün dövlətlər hadisənin gedişatını, İran prezidentinin tapılmasını diqqətlə izləməkdədir.
Hətta Azərbaycan prezidenti daxil, bir çox dövlətlər bu prosesə yardım etməyə hazır olduqlarını bəyan etdilər.

Ulusum.az hadisənin başvermə şəraitinə diqqət çəkir. İran prezidentini müşayiət edən iki helikopter sağ-salamat Tehrana gedib çatır, halbuki onların əsas missiyası, ilk növbədə, dövlət başçısının təhlükəsizliyini təmin etmək idi. Lakin arxada qalan helikopter qəfil sərt eniş edir, qəzaya düşür və üzərindən saatlar keçməsinə rəğmən hələ də bir iz tapılmır.

Qeyd edək ki, bu məqam sosial media istifadəçilərinin də diqqətindən yayınmır, artıq bu hadisənin bir qəza olduğuna şübhə ilə yanaşanlar da var.

Düzdür, qəzanın baş verdiyi şərait əlverişsizdir, üstəlik, havanın dumanlı keçməsi axtarışları çətinləşdirən amillərdəndir.

Lakin İran mediasının yaydığı məlumata görə, helikopter qəzasına uğrayan Rəisi və XİN rəhbəri Abdullahyani axtaran axtarış qruplarından biri yoxa çıxıb.

Bu isə hadisəyə başqa məcradan yanaşma sərgiləyən fakt kimi dəyərləndirilir.

Bu və digər hallar sosial istifadəçilər tərəfindən birmənalı qarşılanmayıb. Onlar İran İnqilab Korpusu (Sepah) ilə Rəisi arasında zaman-zaman yaşanan narazılıqları xatırladaraq bu olayda həmin qüvvələrin payının ola biləcəyini ehtimal edirlər.

Sözsüz, bunlar əsaslandırılmamış, sosial media gündəmində olan fərziyələrdir.

İran prezidenti İbrahim Rəisinin tezliklə tapılması xəbərini çatdırmaq ümidi ilə....
Aymirə Ağamirova