Azərbaycan-Bolqarıstan münasibətlərində YENİ DÖVR

Bolqarıstan Avropada ölkəmizə dost, ən etibarlı tərəfdaş ölkələrdən biridir.

"Azərbaycanla Bolqarıstan arasında 2015-ci ildə strateji tərəfdaşlıq haqqında Bəyannamə imzalanıb və ötən dövrdə iki dövlət arasında əlaqələr uğurla inkişaf edib. Dövlətlər arasında fəal siyasi əlaqələr mövcuddur. Azərbaycan Respublikasının Prezidenti cənab İlham Əliyev ilə Bolqarıstan Respublikasının Prezidenti Rumen Radev arasında şəxsi dostluq ölkələr arasında da dostluq əlaqələrinin möhkəmləndirilməsinə böyük töhfə verir".
Ulusum.az xəbər verir ki, bu açıqlamanı Milli Məclisin deputatı, professor Kamilə Əliyeva verib.
Onun sözlərinə görə, 8 may tarixində Bolqarıstan Respublikasının Prezidenti Rumen Radevin Azərbaycana rəsmi səfərə gəlməsi iki ölkə arasında mövcud əlaqələrin daha da möhkəmləndirilməsinə zəmin yaratdı.

Deputat deyib: "Prezident cənab İlham Əliyev Bolqarıstanlı həmkarının Azərbaycana rəsmi səfəri ilə əlaqədar mətbuata bəyanatla çıxış etdi. Azərbaycanla Bolqarıstan arasında strateji tərəfdaşlıq münasibətlərinin gücləndirilməsinə dair Bəyannamənin imzalanması əlaqələri daha yüksək səviyyəyə çatdıracaq".

Son dövrlər Azərbaycanla Bolqarıstan arasında ticarət dövriyyəsinin 4 dəfə artdığını vurğulayan millət vəkili ticarət dövriyyəsinin əsasını enerji sahəsində əməkdaşlıq təşkil etdiyinə diqqət çəkib. Kamilə Əliyeva bildirir ki, Azərbaycan Bolqarıstanın əsas qaz ixracatçısıdır və bu ölkənin enerji təhlükəsizliyində mühüm rol oynayır.

"Azərbaycan Bolqarıstanın qaz istehlakının 50%-ni təmin edir. Azərbaycan qazının Avropaya ixracında Bolqarıstan tranzit ölkəyə çevrilmişdir. Bolqarıstan ərazisindən keçən Azərbaycan qazı digər Avropa dövlətlərinə də ixrac edilir və hər il bu dövlətlərin sayı artmaqdadır. Yaxın vaxtlarda Azərbaycanda istehsal ediləcək yaşıl enerji də Bolqarıstana ixrac ediləcək.
Prezident cənab İlham Əliyevin təşəbbüsü ilə inşa edilmiş Bakı-Tbilisi-Qars dəmir yolu Orta Dəhlizin bir seqmenti olaraq Şərqdən Qərbə və əks istiqamətdə yük daşımalarına böyük töhfə verir. Dəmir yolunun Azərbaycan dövlətinin sərmayəsi ilə modernləşdirilməsi nəticəsində yükdaşımaların həcmi hər il artmaqdadır".

Qeyd edək ki, bu gün bir çox dövlətlər bu marşrut xətti ilə yükdaşımalarını həyata keçirir. Azərbaycanla Bolqarıstan arasında nəqliyyat sahəsində də əməkdaşlıq əlaqələrinin qurulması istiqamətində mühüm işlər aparılır.