Qazax 2026-cı ilin “İdman paytaxtı” elan olundu – hazırlıqlara start verildi

Qazax 2026-cı ilin “İdman paytaxtı” elan olundu – hazırlıqlara start verildi


Azərbaycan Respublikası Gənclər və İdman Nazirliyinin kollegiyasının qərarı ilə Qazax şəhəri 2026-cı il üçün Azərbaycanın “İdman paytaxtı” elan edilib. Bu münasibətlə hazırlıq işlərinə artıq start verilib.

Yanvar ayında keçiriləcək açılış mərasimi ərəfəsində şəhərin mərkəzi hissələrinə “Qazax İdman Paytaxtı 2026” loqosu yerləşdirilir və digər təşkilati proseslər sürətləndirilib.



Ulusum.az xəbər verir ki, dekabrın 3-də Qazax Rayon İcra Hakimiyyətində Qazax şəhərinin 2026-cı il üçün “İdman paytaxtı” seçilməsi ilə əlaqədar hazırlıq işlərinin mövcud vəziyyətinə və qarşıda duran vəzifələrə həsr olunmuş iclas keçirilib.

İclasda Qazax Rayon İcra Hakimiyyətinin başçısı Rəcəb Babaşov çıxış edərək, Qazaxın zəngin idman ənənələrindən danışıb və şəhərin “İdman paytaxtı” seçilməsinin regionda idmanın inkişafına böyük töhfə verəcəyini vurğulayıb.

Qazax-Tovuz Regional Gənclər və İdman İdarəsinin rəisi Əziz Məsmalıyev bölgədə müxtəlif idman növləri üzrə yarışların təşkili və idman infrastrukturunun genişləndirilməsi üçün əlverişli imkanların olduğunu qeyd edib.



Tədbirdə iştirak edən məşqçilər və idman xadimləri ölkə rəhbərliyinin idmana göstərdiyi diqqət və qayğını yüksək qiymətləndirərək bu layihəyə tam dəstək verəcəklərini bildiriblər.

Sonda iştirakçılar xatirə şəkli çəkdiriblər.

R.Daşdəmirova