Yasamal rayonunda obyektdə yanğın baş verib

FHN-in “112” xəttinə Yasamal rayonu, H.Məcidov küçəsində yerləşən ikimərtəbəli obyektdə yanğın baş verməsi barədə məlumat daxil olub. Dövlət Yanğından Mühafizə Xidmətinin əməkdaşları hadisə yerinə operativ şəkildə cəlb olunub.



Çevik müdaxilə nəticəsində 225 kv.m sahəsi olan obyektin digər hissələrinə və yaxınlıqda park edilmiş avtomobillərə alovun yayılmasının qarşısı alınıb. Yanğın 15 kv.m-lik avtomobil ehtiyat hissələri mağazasında konstruksiyalara ziyan vurub, yüksək temperatur üzündən binanın ikinci mərtəbəsində yerləşən kafenin plastik pəncərələri deformasiya olub.

Hadisə qısa müddətdə söndürülüb, obyektin böyük hissəsi və ətraf tikililər yanğından qorunub. Yanğınla bağlı araşdırma aparılır.

R.Daşdəmirova