"Azərbaycan dilini öyrənirik" kitabının təqdimat mərasimi keçirilib

Noyabrın 18-də "LIBRAFF” kitab mağazaları şəbəkəsinin “Park Akademiya” filialında Səbinə Əliyeva, Hüzurə Ağayeva və Gülarə Əmirovanın həmmüəllifi olduqları "Azərbaycan dilini öyrənirik" kitabının təqdimat mərasimi keçirilib.

“Azərbaycan dilini öyrənirik” kitabının təqdimat mərasimi keçirilib



Səbinə Əliyeva, Hüzurə Ağayeva və Gülarə Əmirovanın həmmüəllifi olduqları kitab məktəbəqədər yaşda olan uşaqlara ana dilini sevdirməyi və onların ilkin dil bacarıqlarını formalaşdırmağı hədəfləyir.



Tədbirdə Heydər Əliyev Fondunun vitse-prezidenti Leyla Əliyeva, Bakı Media Mərkəzinin rəhbəri Arzu Əliyeva və Alena Əliyeva iştirak ediblər.


Mərasimdə çıxış edən Səbinə Əliyeva bildirib ki, kitab 4–6 yaşlı uşaqlar üçün hazırlanıb və 8 bölmədən ibarətdir. Mövzular balacaların qavramasına uyğun olaraq şəkillər üzərində qurulub, öyrənmə prosesi isə mümkün qədər əyləncəli formada təqdim olunub.



Kitabın əsas yeniliklərindən biri olan “dinləyək və öyrənək” rubrikası vasitəsilə Azərbaycan şairlərinin şeirləri QR kod üzərindən səsli şəkildə təqdim edilir. Nəşrdə uşaqların gündəlik ünsiyyət bacarıqlarını inkişaf etdirəcək əsas söz və ifadələr də yer alıb.



Kitabın redaktoru professor Sevinc Əliyeva qeyd edib ki, üç illik zəhmətin nəticəsi olan bu nəşr həm dil sevgisinin formalaşmasına, həm də milli-mənəvi dəyərlərə bağlılığın artırılmasına xidmət edir.



Tədbirdə çıxış edən ziyalılar və alimlər Prezident İlham Əliyevin Azərbaycan dilinin saflığının qorunması ilə bağlı fikirlərini xatırladaraq, bu istiqamətdə görülən işlərin əhəmiyyətini vurğulayıblar.



Onların sözlərinə görə, kitab həm ölkədə, həm də xaricdə yaşayan azərbaycanlı uşaqlar üçün mühüm tədris vəsaitinə çevriləcək.


Təqdimat zamanı kitaba daxil edilən şeirlərdən nümunələr QR kod vasitəsilə səsləndirilib və tədbirin bədii hissəsi iştirakçılar tərəfindən maraqla qarşılanıb.



Ulusum.az / R.Daşdəmirova