Fransa səfirinin sərsəm AÇIQLAMASI...

Fransanın Ermənistandakı səfiri Olivye Dekottiqnies "Azadlıq radiosu"nun erməni bürosuna müsahibə verib.

Ulusum.az xəbər verir ki, o, ölkəsinin Azərbaycandakı səfiri ilə bağlı sualdan yayınsa da, yenə Azərbaycanın ərazi bötüvlüyünə qarşı təxribatçı açıqlama verib.

Diplomat Fransanın Azərbaycandakı səfirinin Bakıya qayıdıb-qayıtmaması ilə bağlı suala cavab olaraq bildirib ki, bu barədə məlumatı yoxdur.

"Onun Parisdə və ya Bakıda olduğunu sizə deyə bilmərəm, amma deyə bilərəm ki, Şuşidə (Ermənilər Şuşa şəhərini belə adlandırır - red.) deyil", - səfir deyib.

Qeyd edək ki, Fransanın Azərbaycandakı fövqəladə və səlahiyyətli səfiri Ann Buayon hələ də Şuşa şəhərinə getməkdən imtina edir.

Fransa səfirinin Şuşaya getməməsi Ermənistanı dəstəkləyən, Qarabağın Azərbaycanın nəzarətinə keçməsini həzm edə bilməyən rəsmi Parisin siyasətindən irəli gəlir.

Ann Buayon bu yaxınlarda Bakı ilə Paris arasında münasibətlərin gərginləşməsi fonunda məsləhətləşmələr üçün Parisə çağırılmışdı. Fransa Xarici İşlər Nazirliyi açıqlamasında xanım diplomatın Prezident Emmanuel Makron tərəfindən qəbul edildiyini bildirmişdi.

Lakin rəsmi Paris sonradan səhvini anlayaraq, səfir Ann Buayonu yenidən Bakıya qaytardı və xanım diplomat hazırda Azərbaycan paytaxtında fəaliyyətini davam etdirməkdədir.