8-11-2025, 11:48 0 Cəmiyyət / Gündəm

Zəfərin Tarixi: 8 Noyabr VİDEO

Sən nələr görmüsən, Azərbaycan...
Tarixin acısını sinəndə daşıyırsan

Xocalının göyə qalxan fəryadını,
Qanlı 20 Yanvar gecəsinin şəhid qanını,
Aprel döyüşlərində torpağa qurban gedən nər oğulların — generalın, polkovnikin, leytenantın izlərini,
Qara sentyabrın çökən sükutunu,
Arazı keçib xilas olmaq istəyərkən boğulan Zəngilanlıların ahını...

Dinc bir günündə bombalanan Gəncənin, Bərdənin
Göz yaşı içində alışan küçələrini,
Güllələrin susdurduğu gənclərin yarımçıq qalan arzularını,
Başlıbelin gecə yarısı çığırtısını,
Laçının, Ağdamın sükutla danışan illərini,
Bağanıs Ayrımda susdurulan körpə səslərini,
Kəlbəcərin gözü yaşlı dağ yollarını,
Şuşanın qanlı gününü,
Füzulinin viran qalan izlərini,
Qubadlının yandırılmış yurdlarını...

Və...
Füzuli, Cəbrayıl işğalından sonra,
Zəngilanın taleyini —
Araz çayını ümidlə keçmək istəyən dinc əhalinin
Soyuq sulara qərq olmuş həyatlarını,
Arazın dərinliyində itən körpə nəfəsini...
Yarı donmuş, yarı ümidsiz gözləntilərlə susan kəndlərini,
Dağlarda şəhid qanı ilə sulanmış torpaqlarını,
Qışın sərt üzündə əriyib gedən illər boyu qurulan ümidlərini...

Amma sən — heç vaxt sınmadın, Azərbaycan!
Sənin yaddaşın qanla yazılsa da,
Qəlbin dəmir, yolun Zəfər, ruhun əzmkar oldu.
Və nəhayət... 8 Noyabr 2020!
Qürurun, qələbən, haqqın zəfəri!

44 günə sığan bu Qələbə — əsrlərin həsrətinə verilən cavab oldu.
Səngərdə əsgər vuruşdu, masada diplomat danışdı, meydanda xalq yumruq kimi birləşdi.
Ali Baş Komandan İlham Əliyevin rəhbərliyi ilə Azərbaycan ordusu Zəfəri tarixə yazdı! Şəhidlərin canı, qazilərin qanı bahasına alınan bu torpaqlar — artıq azaddır!

Biz torpağın üstündə yeriyirik...
Amma altında yatanlar — sadəcə şəhidlər deyil, onlar bir millətin ölməz qürurudur!

Ehtiyatla gəzin bu Vətən torpağında, çünki hər qarışında bir qəhrəman yatır, hər dağda bir igid susur, hər səssizlikdə bir nəğmə pıçıldayır — Zəfər nəğməsi!