Almaniyada yeni seçilmiş merə silahlı hücum – Vəziyyəti kritikdir

Ruhr bölgəsində yerləşən Herdecke şəhərinin yeni bələdiyyə sədri İris Ştaltser çərşənbə axşamı bıçaqlı hücuma məruz qalıb və ağır yaralanıb. Hadisədən sonra o, huşsuz vəziyyətdə tapılsa da, sonradan özünə gəlib.

Müstəntiqlər hadisənin ailə ilə bağlı olduğunu ehtimal edirlər – WDR-in məlumatına görə, diqqət mərkəzində onun övladlığa götürdüyü oğludur.

SPD partiyasının üzvü olan siyasətçi hələ də stasionar müalicə alır. Hadisə çərşənbə axşamı günorta saatlarında baş verib. 57 yaşlı qadın evində ağır yaralı halda tapılıb və xilasedici helikopterlə xəstəxanaya çatdırılıb.

İstintaq yetkinlik yaşına çatmayan oğul üzərində cəmləşib.
Polis sözçüsü Tino Şefer WDR-ə bildirib: “Bizdə cinayətin evdə baş verdiyinə dair ilkin dəlillər var”. Onun sözlərinə görə, cinayətin motivi çox güman ki, ailədaxili münaqişə ilə bağlıdır, siyasi səbəblərə dair sübut yoxdur.

WDR-in araşdırmasına əsasən, daha əvvəl də İris Ştaltserin yaşadığı evdə polis əməliyyatları həyata keçirilib.

“Qurbanın uşaqları hazırda polis nəzarətindədir və məsələni aydınlaşdırmaq üçün onlardan əlavə ifadələr alınır”, – deyə Şefer əlavə edib.

Ulusum.az WDR-ə istinadla xəbər verir ki, prokurorluğun araşdırması əsasən merin övladlığa götürdüyü oğluna yönəlib. Onun barəsində qərarın bu gün məhkəmə tərəfindən veriləcəyi gözlənilir. Bildirilir ki, həmin şəxsin daha əvvəl psixi sağlamlıq problemləri olub.

R.Daşdəmirova
ULUSUM.AZ