"AZƏRBAYCAN EVİ" Argentina və Braziliyada - EKSKLÜZİV

Argentinada yaşayan azərbaycanlı Orxan Məmmədli bir neçə ölkədə "Azərbaycan Evi" açmaq niyyətindədir.

Ulusum.az saytına özəl olaraq açıqlama verən azərbaycanlı gənc Argentinada və Braziliyada Azərbaycan Evi açmağı hədəfləyib.

“Argentinada səfirliyimiz var, lakin azərbaycanlılar elə də çox deyil. Buna rəğmən, ölkəmizi tanıtmaq istəyirəm. Braziliyada ölkəmizi tanıyırlar, lakin daha çox təbliğat işlərinə ehtiyac var. Şəxsi təşəbbüslər də uğurun bir yarısıdır, deyə düşünürəm. Azərbaycan mədəniyyətini, mətbəxini, dilimizi həmin Azərbaycan Evlərində təbliğ etmək arzumdur. Həm də uzaq ölkələrdə azərbaycanlıları bir araya toplamağın üstünlükləri çoxdur. Azərbaycanlılar həmişə öz müsbət xüsusiyyətləri ilə seçiliblər, düşünürəm ki, müsbət tərəflərimizi hər kəs bilməlidir", - deyə həmyerlimiz qeyd edib.

Sözügedən ölkələrdə hazırda bu istiqamətdə işlərə başlanılıb. Tezlikə bununla bağlı aidiyyatı qurumlarla görüşlər təşkil olunacaq.

Qeyd edək ki, "Azərbaycan evləri" dövlətini və xalqını sevən, milli maraqlarımıza hörmətlə yanaşan hər kəs üçün açıq bir müzakirə məkanı, görüş yeridir.
Ağa Dadaşzadə