Makron: Rusiyanın aktivləri müsadirə oluna bilməz

Fransa Prezidenti Emmanuel Makron bildirib ki, Rusiyanın dondurulmuş aktivlərinin müsadirəsi mümkün deyil, çünki bu, beynəlxalq hüquq normalarına ziddir. “Ulusum”.az xəbər verir ki, o, bunu ABŞ-a etdiyi səfər zamanı bildirib, bu məlumatı isə Elysee Sarayı X sosial şəbəkəsində yayımlayıb.

Makron vurğulayıb ki, Rusiyanın dondurulmuş vəsaitlərinin istifadəsi yalnız Ukrayna münaqişəsinin həlli ilə bağlı sülh danışıqları çərçivəsində müzakirə edilməlidir.

“Bu aktivlər tək tərəfli müsadirə oluna bilməz. Onların statusu, kompleks dialoqun bir hissəsi olaraq, danışıqlar masasında müzakirə olunmalıdır,” - deyə Makron qeyd edib.

Həmçinin, Fransa prezidenti bildirib ki, Paris və London Ukraynanın təhlükəsizliyini təmin etmək üçün strategiya hazırlayıblar ki, bu da münaqişə zonasına hərbi qüvvələrin göndərilməsini nəzərdə tuta bilər.

Bazar ertəsi isə Avropa İttifaqının xarici siyasət və təhlükəsizlik məsələləri üzrə yüksək nümayəndəsi Kaja Kallas bildirib ki, Avropa İttifaqı ölkələrinin dondurulmuş Rusiya aktivlərini müsadirə etməyə dair ümumi istəyi yoxdur.

Səidə