NYT: Trampın Tülsi Qabbardın namizədliyinə şübhələri və mühafizəkarların narahatlığı

ABŞ prezidenti Donald Tramp, Tülsi Qabbardın Milli Kəşfiyyat Direktoru vəzifəsinə Konqres tərəfindən təsdiqlənmə şanslarına əmin olmadığını bildirib. “Ulusum”.az xəbər verir ki, "The New York Times" qəzetinin məlumatına görə, Tramp özəl müzakirələrdə müttəfiqlərinə Qabbardın kabinetdə təsdiqlənməsi ilə bağlı narahatlığını ifadə edib.

Mühafizəkarlar Qabbardın "qeyri-ənənəvi düşüncə tərzi"ni tənqid edərək onun ənənəvi yollarla hərəkət edə bilməyəcəyini düşünürlər. Bundan əlavə, Edvard Snoudenin müdafiəçisi olması onun mühafizəkar dairələrdə narazılıq yaratmasının əsas səbəblərindən biridir.

Daha əvvəl "Axios" nəşri, Qabbardın elektron nəzarət məsələsində mövqeyini dəyişdiyini qeyd edib. İndi o, Xarici Kəşfiyyat üzrə Müşahidə Qanununun 702-ci maddəsini dəstəkləyir və bu proqramın ölkəni qorumaqla yanaşı, amerikalıların vətəndaş azadlıqlarını təmin edəcəyini bildirib.

Məqalədə vurğulanır ki, Qabbardın mövqeyindəki dəyişiklik onun namizədliyinin çətinliklərlə üzləşdiyi bir dövrə təsadüf edir. Əvvəllər o, bu təşəbbüsü tənqid edir və qanunvericilik səviyyəsində ləğvini təklif edirdi.

Bu məqamlar Qabbardın namizədliyinin müzakirələrində həm siyasi, həm də ideoloji gərginlik yaratmaqdadır.

Səidə