Netanyahu Qəzza sektorunda döyüşlərin yenidən başlanmasını istisna etmir

İsrailin Baş naziri Benyamin Netanyahu bildirib ki, HAMAS-la bağlanmış razılaşmanın ikinci və üçüncü mərhələləri, şərtləri daha sonra müzakirə ediləcək, həyata keçirilməzsə, İsrail Qəzza sektorunda hərbi əməliyyatlara yenidən başlamaq hüququna malikdir.

“Ulusum”.az xəbər verir ki, bu barədə şənbə günü The Times of Israel məlumat yayıb.

"Əgər döyüşlərə qayıtmaq məcburiyyətində olsaq, yeni və qətiyyətli üsullarla bunu həyata keçirəcəyik", - deyə Netanyahu video müraciətində qeyd edib.

O vurğulayıb ki, İsrailin Qəzza sektorundakı qruplaşmalara qarşı zərbələri bərpa etmək hüququ həm ABŞ-ın hazırkı prezidenti, həm də seçilmiş prezidenti Co Bayden və Donald Tramp tərəfindən tanınıb.

Baş nazir həmçinin razılaşmanın birinci mərhələsini "müvəqqəti atəşkəs" adlandırıb. Netanyahu bildirib ki, birinci mərhələ ərzində İsrail Fələstin dəhlizində yerləşdirilən hərbçilərin sayını azaltmaq əvəzinə artıracaq.

Eyni zamanda, nəşr qeyd edir ki, HAMAS-la bağlanmış razılaşmada İsrailin "birinci mərhələ ərzində dəhlizdəki hərbçilərin sayını tədricən azaldacağı" qeyd olunub.

Məlumata görə, birinci mərhələnin bazar günü səhər qüvvəyə minməsi gözlənilir. Əgər bu mərhələ uğurla həyata keçirilərsə, tərəflərin növbəti mərhələlər haqqında razılığa gəlməsi nəzərdə tutulur.

Birinci mərhələ 42 gün davam edəcək. Bu müddətdə atəşkəs rejimi qüvvədə olacaq, İsrail qüvvələri Qəzza sektorunun ən sıx məskunlaşmış bölgələrini tərk edərək anklavın sərhədlərinə çəkiləcək. HAMAS isə 33 israilli girovu, o cümlədən qadın və yaşlı vətəndaşları azad edəcək, İsrail isə 1,890 fələstinli məhbusu sərbəst buraxacaq.

Səidə Mustafa