“Sevgi odası: Əli və Nino balı” - Şərq və Qərbin əbədi tarixinə qərq olma

“Bu, dünya şöhrətli “Əli və Nino” əsərinin XIX əsrin sonlarına aid tarixi binada – öz dövrünün simvolu –de Bur Sarayında öz yerini tapdığı unikal bir layihədir”.

"Ulusum".az AZƏRTAC-a istinadən xəbər verir ki, bu barədə Azərbaycan Milli İncəsənət Muzeyinin direktoru Şirin Məlikova Azərbaycan Milli İncəsənət Muzeyində keçirilən “Sevgi odası: Əli və Nino balı” adlı unikal immersiv tamaşa çərçivəsində jurnalistlərə məlumat verib.

O, tədbirin ilk dəfə bu formatda keçirildiyini də vurğulayıb: “Tamaşanın immersiv formatı Azərbaycan Dövlət Akademik Rus Dram Teatrı üçün ilk təcrübə oldu. Mən onun direktoru Ədalət Hacıyevə, quruluşçu rejissor İlqar Safata, həmçinin aktyorlara səmimi təşəkkürümü bildirirmək istəyirəm. Bu, bizim ilk layihəmizdir və ümid edirik ki, fəaliyyətimizi oxşar formatda davam etdirəcəyik”, - deyə Ş.Məlikova bildirib.

Rejissor İlqar Safat çıxışında əsas vurğunun baş qəhrəmanların sevgi hekayəsinə verildiyini, onu dramatik tarixi fonla tamamladığını qeyd edib. O, həmçinin Ş.Məlikovaya və Mədəniyyət Nazirliyinə minnətdarlığını bildirib.

Rus Dram Teatrının aktyorları səhnədə çıxış edərək tamaşaçıları Şərqlə Qərbin, ənənələrin və müasirliyin toqquşduğu XX əsrin əvvəllərindəki dövrə qərq ediblər. Hər bir qonaq özünü bir məşhur romanın qəhrəmanı kimi hiss edərək, bu hekayənin bir hissəsi olmaq imkanı əldə etdi.

Gözlənildiyi kimi, keçmiş dövrlərin ənənələrindən ilhamlanan rəqslər, Əli və Ninonun böyük sevgisinin sirləri xüsusi diqqət çəkib.