Kim Çen İn Şimali Koreya sakinlərinə hot-doq yeməyi və boşanmağı qadağan edib

Şimali Koreyanin lideri Kim Çen In, ölkə daxilində hot-doq yeməyi və boşanmağı rəsmi olaraq qadağan edib.

Bu barədə Daily Mail məlumat yayıb.

Qərar, liderin Qərb mədəniyyətinin təsirini azaltmaq və milli ənənələri qorumaq siyasətinin bir hissəsi kimi dəyərləndirilir.

Məlumatlara görə, Kim Çen In hot-doq yeməyini "çox qərbpərəst bir yemək" adlandırıb və onun hazırlanmasını dövlətə xəyanət aktı kimi qiymətləndirib. Bu qaydanı pozan şəxslər əmək düşərgələrinə göndərilə bilər. Qadağanın məqsədi, Şimali Koreya cəmiyyətində Qərb təsirini minimuma endirmək və xalqı daha da intizamlı etməyə yönəlib.

Eyni zamanda, ölkədə boşanma da ciddi şəkildə məhdudlaşdırılıb. Boşanmaq istəyən ailə cütlükləri altı aya qədər həbs cəzası ilə üzləşə bilərlər. Qadınların isə bu cəzanı daha uzun müddət çəkə biləcəyi qeyd olunur. Bu addımın arxasında, ailə dəyərlərini möhkəmləndirmək və cəmiyyətdə sosial sabitliyi qorumaq məqsədi dayanır.

Bu qərarlar Şimali Koreya hökumətinin cəmiyyəti nəzarətdə saxlamaq və xarici təsirləri məhdudlaşdırmaq istiqamətindəki sərt tədbirlərinin davamıdır. Qərb dünyası bu addımları insan haqlarının pozulması kimi qiymətləndirir, lakin Şimali Koreya rəhbərliyi bunu ölkənin milli maraqlarını qorumaq kimi əsaslandırır.

Səidə Mustafa