WSJ: İran, Əsədin gedişindən sonra öz qüvvələrinin əsas hissəsini Suriyadan çıxarib

İran Suriyadan öz silahlı qüvvələrinin əsas hissəsini çıxarıb.

Bu barədə The Wall Street Journal (WSJ) mənbələrə istinadən xəbər verir.

Bu addımın səbəbləri rəsmi olaraq açıqlanmasa da, ekspertlər bunu regionda dəyişən siyasi və hərbi vəziyyətlə əlaqələndirirlər. Xüsusilə, Suriya müxalifətinin hakimiyyətə gəlməsi və beynəlxalq təzyiqlərin artması İranın bu qərarını sürətləndirmiş ola bilər.

Amerikalı, avropalı və ərəb rəsmilərinin fikrincə, İran qüvvələrinin Suriyadan çıxması bölgədəki qüvvələr balansına təsir edə bilər. İran uzun müddətdir ki, Suriya hökumətini dəstəkləyən əsas xarici qüvvələrdən biri kimi çıxış edirdi və bu dəstək həm hərbi məsləhətçilər, həm də birbaşa silahlı qüvvələrlə həyata keçirilirdi.

Bəzi analitiklər hesab edirlər ki, İranın bu addımı həm daxili iqtisadi problemləri, həm də beynəlxalq təzyiqləri azaltmaq məqsədi daşıyır. Digərləri isə bunun İranın bölgədəki yeni strategiyası ilə əlaqəli ola biləcəyini düşünürlər.



Səidə Mustafa