Dinlər silah deyil, dünyada birliyin körpüsü olmalıdır - Vatikan

Ulusum.az xəbər verir ki, Roma Katolik Kilsəsinin rəhbəri Papa XIV Leo oktyabr ayı üzrə yaydığı video-dua müraciətində dinlərin birləşdirici roluna diqqət çəkib.

O bildirib ki, dünya hər nə qədər gözəlliklərlə zəngin olsa da, dərin parçalanmalarla zədələnib və bəzən dinlər birləşdirmək əvəzinə qarşıdurma mənbəyinə çevrilir.

“Qoy dinlər silah və ya divarlar kimi istifadə olunmasın, əksinə, körpü və peyğəmbərlik mənbəyi olsunlar. Dinlər ümumi rifah arzusunu əlçatan etsinlər, həyatımıza yoldaşlıq etsinlər, ümidi yaşatsınlar və parçalanmış dünyada birliyin mayası olsunlar”, – deyə Papa qeyd edib.

O, dinlərdəki sülh, ədalət və qardaşlıq kimi dəyərlərin fərqliliklərə rəğmən birgə yaşamağın və əməkdaşlığın mümkün olduğunu sübut etdiyini vurğulayıb və müxtəlif dini ənənələrə mənsub insanları bu yolda ortaq dualarla birləşməyə çağırıb.

R.D