Sidneyin “boz kabusu” qayıtdı: çimərliklərdə qəribə kütlələr

The Guardian yazır ki, Yeni Cənubi Uels ştatının çimərliklərində naməlum boz kütlələr aşkarlanıb. Ətraf mühitin mühafizəsi idarəsi əraziyə təmizlik briqadaları göndərib.

Hələlik onların mənşəyi məlum deyil. İlkin versiyalara görə, bu, yanvarda Sidney sahillərində baş verən oxşar hadisə ilə bağlı ola bilər. O zaman laboratoriya analizləri göstərmişdi ki, bu şarlar tərkibində karbohidrogenlər, yağ turşuları, bağırsaq çöpü bakteriyaları və hətta vulkanik pemza qalıqları saxlayır.

Yeni Cənubi Uels Universitetinin professoru isə bildirib ki, bu obyektlər son dərəcə xoşagəlməz qoxu yayır. Mütəxəssislər istisna etmirlər ki, hadisə kanalizasiya sistemindəki nasazlıqla bağlıdır. Artan əhali və köhnəlmiş infrastruktur sızmalara yol aça bilər.

Ulusum.az