Aİ sərhəd qaydalarını dəyişir

Avropa boyunca səyahət edən turistləri 2025-ci il oktyabrın 12-dən etibarən sərhəd nəzarəti prosedurlarında əhəmiyyətli dəyişikliklər gözləyir. Xarici KİV-in məlumatına görə, həmin gün Avropa İttifaqı ənənəvi pasport möhürlərini əvəz edəcək yeni Giriş/Çıxış Sistemi (EES)-ni işə salacaq. Bu sistem, Aİ-yə daxil olmayan ölkələrin vətəndaşları üçün pasporta vurulan möhürlər əvəzinə rəqəmsal biometrik skan etmə üsulundan istifadə edəcək.

Xaricilər biometrik məlumat verməkdən imtina edə bilməyəcək, əks halda onların ölkəyə girişi rədd ediləcək. Toplanan məlumatlar üç il ərzində saxlanılacaq və sonra avtomatik olaraq silinəcək.

Sistem Aİ-yə üzv bütün dövlətlərdə (Kipr və İrlandiya istisna olmaqla), həmçinin Aİ üzvü olmayan, lakin Şengen zonasına daxil olan dörd ölkədə — İslandiya, Lixtenşteyn, Norveç və İsveçrədə fəaliyyət göstərəcək.

EES sisteminin işə düşməsindən sonra digər mühüm dəyişiklik də gözlənilir — Avropa Səyahət Məlumatı və İcazə Sistemi (ETIAS). Bu sistemin istifadəyə verilməsi 2026-cı ilin sonunda planlaşdırılır. ETIAS, Aİ-yə daxil olmayan ölkələrdən gələn səyahətçilərdən 20 avro məbləğində rüsum ödəməyi və Şengen zonasına səfərdən əvvəl icazə almağı tələb edəcək.

Ulusum.az