Nazarbayevin qızı İspaniyada qalmaqal yaratdı

Türk respublikaları 1991-ci ildə Sovet Sosialist Respublikaları İttifaqından ayrıldıqda, Qazaxıstanın rəhbəri kimi o dövrdə Qazaxıstan Sosialist Respublikası keçmiş Baş naziri və Qazaxıstan Kommunist Partiyası Mərkəzi Komitəsinin Birinci Katibi olmuş Nursultan Nazarbayev gətirildi.

Qazaxıstanın qurucu dövlət başçısı titulunu daşıyan Nursultan Nazarbayev ölkəsini 1 dekabr 1991-ci ildən 19 mart 2019-cu ilədək idarə etdi. Dövlət başçılığından ayrıldıqdan sonra da dövlət qurumlarında mühüm vəzifələrdə çalışdı.

Nursultan Nazarbayevin ən böyük qızı Dariğa atasının yolunu davam etdirərək siyasətçi oldu. Digər qızları Dinara və Aliya isə iş dünyasına atıldı. Dinaranın ölkənin ən zəngin dördüncü şəxsi olduğu məlumdur. Nazarbayevin qızlarının həyatı indiyədək çox yazılıb-yarılıb.

Dinara Qulıbayeva 2007-ci ildə İspaniyanın turistik şəhəri Lyoret de Mar-da Can Juncadella adı ilə tanınan möhtəşəm bir villanı satın aldı. Lakin villanın ətrafında inşa edilən hündür divarlar bölgə sakinlərinin çimərliyə çıxışına mane oldu.

Zaman-zaman etiraz aksiyaları keçirildi, bölgə sakinləri yolun açılması üçün İspaniya məhkəməsinə müraciət etdi. Məhkəmə 2023-cü ildə yolun açılmasına qərar verdi. Yol texniki olaraq açıq olsa da, bölgə sakinləri həmin yolu istifadə edə bilməməkdən şikayətçidir.

İspaniya mətbuatına əsasən, villanın ətrafında qaçış edənlər silahlı mühafizə tərəfindən saxlanılır və ərazinin xüsusi mülk olduğu bildirilib.

İspaniya mətbuatında yer alan məlumatlara görə, Dinara Qulıbayeva illərdir villaya gəlmir. Ancaq divarlar və mühafizəçilər səbəbindən əraziyə keçmək istəyənlər sahilə çatmaq üçün 20 dəqiqə əlavə gəzintiyə məcbur qalırlar.

İspaniyadakı mübahisəyə bənzər bir məsələ Qazaxıstanda da gündəmdədir. Qazax deputatları Baxıtcan Bazarbek və Sergey Ponomaryov Almata şəhərinin Almarasan vadisində yerləşən Almerik küçəsinin xalq tərəfindən istifadə edilə bilmədiyini gündəmə gətiriblər. Araşdırmalarda 6.25 hektar ərazi və içindən keçən yolun 2007-ci ildən bəri Dinara Qulıbayevaya aid olduğu məlum olub.

Ulusum.az