ABŞ Ukraynaya 500 milyon dollarlıq yeni hərbi yardım paketini təsdiqlədi

ABŞ Konqresinin Senatındakı Silahlı Qüvvələr Komitəsi Kiyevə hərbi yardım üçün 500 milyon dolların ayrılmasını təsdiqləyib. Bu məbləğ 2028-ci ilə qədər Ukraynaya göstəriləcək təhlükəsizlik dəstəyi təşəbbüsü (USAI) çərçivəsində nəzərdə tutulub.

Bu maddə ABŞ-ın 2026-cı maliyyə ili üçün müdafiə büdcəsi layihəsinə daxil edilib. TASS-ın yazdığına görə, komitənin yaydığı məlumatlara əsasən, qəbul edilən qərarlar USAI proqramının müddətini 2028-ci ilə qədər uzadır və onun maliyyələşməsini 500 milyon dollara qədər artırır.

Təklif olunan büdcə layihəsində ABŞ-ın siyasətinin Ukraynaya etibarlı müdafiə və caydırıcı güc qurmaqda kömək göstərmək, həmçinin müdafiə və təhlükəsizlik sahəsində əməkdaşlığı gücləndirmək olduğu bildirilir. Məqsəd – Ukrayna Silahlı Qüvvələrinin ölkəni qorumağa qadir hala gətirilməsidir.

Bundan əlavə, layihə ABŞ müdafiə naziri Pit Hegseti Ukrayna hökumətinə kəşfiyyat dəstəyi göstərməyə — məlumatlar, kəşfiyyat bilgiləri və peyk görüntüləri təqdim etməyə məcbur edir.

Ulusum.az