Kadırov sükutu pozdu – uzun fasilədən sonra hökumət qarşısına çıxdı

Çeçenistan rəhbəri Ramzan Kadırov üç aylıq fasilədən sonra ilk dəfə olaraq respublika hökumət üzvləri ilə müşavirə keçirib. O, bu barədə Telegram kanalında məlumat paylaşıb.

İclas zamanı əsas müzakirə mövzusu xüsusi hərbi əməliyyatın (SVO) gedişi olub. Bu barədə Çeçenistanda SVO üzrə operativ qərargahın rəhbəri Maqomed Daudov hesabat təqdim edib.

Kadırov bildirib ki, bu günə qədər Çeçenistandan SVO zonalarına 60 344 nəfər göndərilib, onlardan 22 064 nəfəri könüllü olub.

“Hazırda 13 mindən çox çeçen hərbçi əsas istiqamətlərdə şərəf və ləyaqətlə döyüş tapşırıqlarını yerinə yetirir”, – deyə Kadırov qeyd edib.

Yeni veteran təşkilatları və kadr hazırlığı proqramı

Çeçenistan rəhbərinin administrasiya başçısı Qalas Taymasxanov açıqlayıb ki, yaxın günlərdə regionda SVO veteranlarının hüquqlarını müdafiə və onların cəmiyyətə inteqrasiyasını təmin edəcək “Veteranlar Assosiasiyası” adlı yeni ictimai təşkilat yaradılacaq.

Bundan əlavə, Kadırov bildirib ki, Çeçenistanda artıq “Vətən müdafiəçilərinin ailələri komitəsi” adlı qeyri-kommersiya təşkilatı fəaliyyətə başlayıb.

Federal “Qəhrəmanlar Zamanı” layihəsinə bənzər şəkildə, Çeçen Dövlət Universiteti (ÇDU) bazasında “Turpalxo-95” adlı xüsusi proqram həyata keçiriləcək. Bu proqram çərçivəsində SVO veteranları peşəkar idarəçi kimi hazırlanaraq, gələcəkdə dövlət və yerli idarəetmə orqanlarında çalışacaqlar.

Ulusum.az