Ölməz Səsin Sahibi – Xalq artisti Sara Qədimova yaddaşlarda yaşayır

Sara Bəbiş qızı Qədimova – Azərbaycanın incilərindən biri, səhnəmizin əvəzolunmaz səsi – 1922-ci il mayın 31-də Bakıda dünyaya gəlib. Əslən Ağdamın Abdal-Gülablı kəndindən olan bu böyük xanəndə Azərbaycan musiqisinin canlı simvoluna çevrilmişdir.

Əmək fəaliyyətinə 1941-ci ildə Müslüm Maqomayev adına Azərbaycan Dövlət Filarmoniyasında solist kimi başlayan Sara Qədimova, nadir istedadı və ilahi səsi ilə tez bir zamanda tamaşaçıların könlünü fəth etdi.

İkinci Dünya müharibəsi zamanı Üzeyir Hacıbəyov və Səməd Vurğunun yaratdığı, cəbhədə səsləndirdiyi "Şəfqət bacısı" mahnısı Sara Qədimovanı qəhrəman Azərbaycan qadınının simvoluna çevirdi.

Ustad sənətkarlar – Hüseynqulu Sarabski, Xan Şuşinski, Seyid Şuşinski – onun sənətkar kimi formalaşmasında mühüm rol oynayıblar. Sara Qədimova da bu böyük məktəbin davamçısı kimi klassik muğam ifaçılığına ömrünün sonuna qədər sadiq qaldı.

Azərbaycan Dövlət Opera və Balet Teatrının səhnəsində yaratdığı Leyli və Əsli obrazları, ifa etdiyi "Bayatı-Şiraz", "Şur", "Mahur-Hindi", "Xaric Segah" və digər muğamlar, "Qarabağ şikəstəsi" ilə yaddaşlara həkk olundu. Onun oxuduğu xalq və bəstəkar mahnıları milli musiqimizin qızıl səhifələrinə yazıldı.

Sara Qədimova yalnız bir xanəndə deyil, həm də milli ruhun, muğamın, Azərbaycan qadınının simvolu idi. Onun səsi – lirik-koloratur soprano – dinləyicinin ruhuna toxunan, qəlbində iz buraxan bir səs idi. Yaradıcılığına sədaqət, xalqa məhəbbət və sənətə hörmət damğa vurmuşdu.

60 ildən artıq bir dövrü əhatə edən sənət yolu gənc xanəndələrə örnəkdir. O, Azərbaycan musiqisini dünyanın müxtəlif ölkələrində uğurla təmsil edərək xalqımızın səsini dünyaya tanıtdı.

Sara Qədimova müğənni Akif İslamzadənin anası, xanəndə Hacıbaba Hüseynovun baldızı idi.

O, 2005-ci ilin mayın 12-də – ömrünün 82-ci baharında bu dünyadan köçdü, amma səsi və sənəti daim yaşayır.

Ulusum.az