HAMAS-dan İsrailə: Girovların buraxılması üçün tələblər

CNN-in məlumatına görə, Fələstin radikal hərəkatı HAMAS-ın yüksək vəzifəli nümayəndəsi bildirib ki, onlar müəyyən şərtlərlə 7-dən 9-a qədər israilli girovun azad edilməsinə hazırdırlar.

Tələblərə əsasən, HAMAS Qəzzada iki aylıq atəşkəsin təmin olunmasını və İsrail həbsxanalarından 300 fələstinli məhbusun azad edilməsini istəyir. Bundan əlavə, razılaşma İsrail Müdafiə Ordusunun (ÇAHAL) qüvvələri sektorun kənarlarına çəkilməsinə bağlıdır.

Bir neçə saat əvvəl İsrail Ordusu “Gedeyon Arabaları” əməliyyatı çərçivəsində Qəzzanın şimal və cənubunda genişmiqyaslı quru əməliyyatlarına başlayıb.

14 may tarixində məlum olub ki, HAMAS, İsrail tərəfi və vasitəçilər arasında Qəzza məsələsinin həlli üzrə dolayı danışıqlar yenidən başlayacaq və əsas vasitəçi kimi ABŞ nümayəndələri çıxış edəcəklər.

✍️"Ulusum".az