Zelenski Rusiya ilə danışıqlarda iştirak edəcək nümayəndə heyətini təsdiqlədi

Ukrayna Prezidenti Vladimir Zelenski, Rusiya ilə İstanbulda keçiriləcək danışıqlarda iştirak edəcək Ukrayna nümayəndə heyətinin tərkibini rəsmi olaraq təsdiqləyib. Müvafiq prezident sərəncamı Ukrayna Prezidentinin Ofisi tərəfindən dərc olunub.

Sərəncamda deyilir:

«Türkiyə Respublikası və Amerika Birləşmiş Ştatları nümayəndə heyətləri ilə yanaşı, Rusiya Federasiyasının nümayəndələri ilə də keçiriləcək danışıqlarda iştirak etmək üçün Ukrayna nümayəndə heyəti yaradılır. Danışıqlar 2025-ci ilin 15–16 may tarixlərində planlaşdırılır.»

Ukrayna nümayəndə heyətinin rəhbəri kimi Ukrayna Müdafiə naziri Rüstəm Umerov təyin olunub.

Nümayəndə heyətinin tərkibinə aşağıdakı şəxslər daxildir:

Sergiy Kislıtsya — Xarici İşlər Nazirinin birinci müavini

Aleksandr Poklad — Təhlükəsizlik Xidmətinin sədr müavini

Oleg Luqovski — Xarici Kəşfiyyat Xidmətinin birinci sədr müavini

Aleksey Şevçenko — Silahlı Qüvvələrin Baş Qərargah rəisinin müavini

Vadim Skibitski — Müdafiə Nazirliyinin Baş Kəşfiyyat İdarəsinin rəis müavini

Sərəncamda həmçinin qeyd olunur ki, Rüstəm Umerov nümayəndə heyətinin tərkibində dəyişiklik etmək səlahiyyətinə malikdir.

Bundan əlavə, 15 may tarixində Ankarada Ukrayna Prezidenti Zelenski Türkiyə Prezidenti Rəcəb Tayyib Ərdoğan ilə görüş keçirib. Görüşdən sonra təşkil olunmuş mətbuat konfransında Zelenski bildirib ki, Rusiya ilə danışıqlar ya həmin gün axşam, ya da 16 mayda baş tuta bilər.

O, eyni zamanda, Müdafiə naziri Rüstəm Umerovun nümayəndə heyətinə rəhbərlik edəcəyini təsdiqləyib. Zelenskinin özü isə danışıqlarda iştirak etməyəcək.

Rusiya nümayəndə heyətinə Prezidentin köməkçisi Vladimir Medinski rəhbərlik edir. Onu müşayiət edən şəxslər bunlardır:

Mixail Qaluzin — Xarici İşlər nazirinin müavini

İqor Kostyukov — Silahlı Qüvvələrin Baş Kəşfiyyat İdarəsinin rəisi

Aleksandr Fomin — Müdafiə nazirinin müavini

✍️"Ulusum".az