Bu, onların üçüncü görüşü olacaq: Trampın adamı Putinin qapısında

ABŞ prezidentinin Yaxın Şərq üzrə xüsusi nümayəndəsi Stiven Uitkoffa məxsus olduğu deyilən “biznes-jet” təyyarəsi Rusiyaya enib.

“Ulusum”.az xəbər verir ki, bu barədə “İnterfax” agentliyi Rusiyanın aviasiya xidmətinə istinadla məlumat yayıb. Təyyarə bir gün əvvəl Mayamidən havaya qalxıb və artıq Rusiyaya çatıb. Açıq mənbələrdə bu təyyarədən məhz Uitkoffun istifadə etdiyi bildirilir.

İddialara görə, səfərin əsas məqsədi Vladimir Putinlə görüşdür. “Axios” portalının məlumatına görə, Trampın nümayəndəsi cümə günü Rusiya prezidenti ilə üz-üzə görüşə bilər. Bu, Uitkoff və Putinin üçüncü görüşü olacaq.

Mənbələrin bildirdiyinə görə, ABŞ administrasiyası Ukraynada atəşkəslə bağlı irəliləyişin olmamasından narazıdır və Tramp artıq Moskvanın son mövqeyindən “qəzəbləndiyini” gizlətmir.

“Əgər bu ayın sonuna qədər atəşkəs əldə olunmasa, Tramp ya fərdi sərəncamla, ya da Konqres vasitəsilə yeni sanksiyaları gündəmə gətirə bilər”, – deyə “Axios” portalı adını açıqlamayan mənbəyə istinadən yazır.

Hazırda Dövlət Departamenti bu səfərlə bağlı heç bir açıqlama verməyib. Amma görünən odur ki, səhnə arxasında nələrsə bişir və Uitkoffun Moskvadakı varlığı təsadüfi deyil.