Son günlər bazarlarda ağartı məhsulları bahalaşıb

Son günlər Salyan bazarlarında ağartı məhsullarının qiymətində artım hiss olunur. Bu vəziyyətdən həm alıcılar, həm də satıcılar narahatdır. Ağartı məhsulları demək olar ki, bürün ailələrin əsas qida mənbələrindəndir. İllərdir bu məhsullara maraq onların qiymətinin stabil qalması ilə nəticələnirdisə, bu il həmin sahədə də qiymət artımı müşahidə olunur. Satıcılar qiymət artımının tək onlara yox, alıcılara da mənfi təsir etdiyini bildirir. Belə ki, artıq uzun müddətdir Salyanın ağartı məhsulları bazarında durğunluq hökm sürür. Satıcı Dilbər Yaqubova deyir ki, “Şoru gətirilər 2 manata, satırıq 2.50-yə. 50 q.ondan pul qazanırıq. Bax, günortadan keçibhələ yarım kilo biz tərəziyə şor qoymamışıq. Heç yarım kilo pendir satmamışıq. Pensiya alırıq, qaçıb məhsul alırıq ki, nəsə sataq, o da yoxdur. Alıcılıq qabiliyyəti yoxdur. Baha alırıq. Gətirənə mən necə deyim sən malını at çölə? Deyə bilmirəm, məcburam o nə deyir mən də elə alım. Deyirəm 50q.mən qoyum. 2.50 q verəndə mən də 50 q qoyanda ala bilmir camaat”.
Alıcılar da satıcılar da qədər eyni dərddədir. Hər kəs qiymətlərin bahalığından şikayətlənir. Alıcılar məsələnin bu həddə çatmasını rayonda heyvandarlığa marağın itməsi, yem bazasının azalmasına bağlayır. Bazarda alıcıların da fikirlərini öyrənməyə çalışdıq. Rayon sakini Şahlar Salahov deyir ki, “Mən kənddə yaşayıram, heyvan da saxlayırarm. Düzdür, süd, qatıq əldə edirik, amma bir müddət sonra yem bazasının zəifləməyi heyvanların belə deyək bazardan da almaq ehtiyacı yaranır. Düzdür, keçən ilə nisbətən bir az qiymətlərdə bahalaşma var, təqribən 50 q, 1 manat bahalaşma var”.
Ekspertlərin sözlərinə görə ağartı məhsullarında məhsullarında bahalaşma ümumi xarakter daşıyır. Həm heyvandarlıq, həm yem bazası problemləri ağartı məhsullarının qiymətinə təbii olaraq təsir edir.
Qeyd edək ki, Salyan bazarlarında növünə görə 1 kq pendir 5, 6, 7, 1 kq şor 2.50, 3, 4, 1 litr süd 1 manata satılır. Ötən illə müqayisədə qiymətlərdə 50 q, 1 manat, bəzən isə 1.50 qəpik bahalaşma müşahidə olunur.



Eltun Məmmədov