Şimal bölgəsində növbədənkənar parlament seçkiləri seçici fəallığı ilə davam edir

Azərbaycan Respublikasının Milli Məclisinə növbədənkənar seçkilər şimal bölgəsində seçici fəallığı ilə davam edir.
"Ulusum.az"ın Şimal bürosunun məlumatına görə, şimal bölgəsində seçki hüququ olan vətəndaşlar 55 saylı Siyəzən – Quba - Xızı, 56 saylı Şabran - Xaçmaz, 57 saylı Xaçmaz şəhər, 58 saylı Xaçmaz kənd, 59 saylı Quba, 60 saylı Quba – Qusar və 61 saylı Qusar Seçki Dairələrində 430 məntəqədə səs verirlər.

Vətəndaşlar bölgədə 7 deputat yeri uğrunda namizədliyi qeydə alınan 53 namizəd arasında seçim edirlər. Bu bölgədə qeydə alınan seçicilərin sayı 345 min 784 nəfərdir. Onlardan 15 min 62 nəfəri ilk dəfə səs verən gənclərdir.

Bölgənin ən yaşlı seçicisi Şabran rayonunun Ağbaş kəndində yaşayan 104 yaşlı Meynas Maqsudovadır.

Şimal bölgəsində olan seçki dairələrinin hər biri üzrə seçici fəallığı müşahidə olunur.

Səhər 08:00-da başlayan səsvermə saat 19:00-da başa çatacaq.