Cəlilabadda qədim kənd qalıqları aşkar edilib - FOTOLAR

Cəlilabad rayonunda 3 ildir ki, araşdırılan qədim yaşayış məskəni Paşatapə abidəsində ilk dəfə olaraq qədim kənd qalıqları aşkar edilib.

Qazıntılar zamanı çiy kərpicdən inşa edilmiş yaşayış evlərində həm də dini ayinlərin icra edilməsi üçün xüsusi yerlər də üzə çıxıb.

Cəlilabad rayonunun Cəfərxanlı kəndində yerləşən Paşatəpə qədim yaşayış məskənində ilk qazıntılara 2022-ci ildə başlanılıb. Arxeoloji qazıntılar zamanı hər mövsüm olduğu kimi bu il də maraqlı maddi mədəniyyət nümunələrinin tapılması buranın tarixi əhəmiyyətini daha da artırıb. Bu il ilk dəfə olaraq ərazidə neolit kəndi aşkarlanıb. Bu kəndin əsas özəlliklərindən biri isə evlərin çiy kərpicdən inşa olunmasıdır.

AMEA-nın Arxeologiya, Etnoqrafiya və Antropologiya İnstitutunun aparıcı elmi işçisi, tarix üzrə fəlsəfə doktoru Vəfa Mahmudova bildirib ki, ərazidə çoxsaylı yaşayış evlərinin qalıqlarının üzə çıxması burada bir məhəllənin olduğunu deməyə əsas verir.
“Paşatəpə yaşayış yeri b.e.ə. VI minilliyin birinci yarısına aid edilir. Bu il abidədə qazıntılar zamanı bitki qarışıqlı çiy kərpicdən hazırlanmış evlərin yerləri, təsərrüfat quyuları aşkar edilmişdir. İlin ən maraqlı tapıntılarından biri yaşayış yerində dini ayin yerinin qeydə alınmasıdır. Bu il eyni zamanda kremasiya adəti ilə bağlı dəfn etməyə də rast gəlinib. Bütün bunlar Paşatəpə abidəsinin neolit dövrünə aid kənd tipli yaşayış yeri olduğunu söyləməyə əsas verir” , - deyə Vəfa Mahmudova bildirib.
Tarixçilər hesab edirlər ki, tapılmış nümunələrin araşdırılması Muğan mədəniyyətində erkən əkinçilik, sənətkarlıq, eləcə də digər sahələrlə bağlı maraqlı məlumatları üzə çıxara bilər.

Eltun Məmmədov