Şəhid Şöhrət Nuriyevin nəşinin qalıqları dəfn olundu - Ucarda

Nuruyev Şöhrət Telman oğlu 1969-cu ilin 17 iyun tarixində Ucarın Əlikənd kəndində anadan olub.

Orta təhsilə Mərdəkan qəsəbəsində yerləşən 12 saylı məktəbdə başlayıb və 8-ci sinfə qədər orada oxuyub.

Ulusum.az-ın məlumatına əsasən, sonradan doğulduğu Ucarın Əlikənd kəndinə qayıdaraq orta məktəbi orada başa vurub.

1987-89-cu illərdə Sovet ordusunda həqiqi hərbi xidmət keçib, 92-ci ildə gedən Qarabağ döyüşlərinə könüllü olaraq qatılıb. 93-ün fevralında yaralanaraq evə qayıdıb, lakin qısa zamanda özünü yaxşı hiss edən kimi yenidən səngərlərə dönüb.

1993-cü il aprelin 18-də Murovdağ istiqamətində gedən döyüşlərdə qəhrəmancasına şəhid olub. Lakin təəssüflər olsun ki, uzun müddət şəhidimizin nəşi tapılmayıb.

Nəhayət, 31 ildən sonra şəhid Nuruyev Şöhrət Telman oğlunun nəşi tapılaraq doğulduğu Ucar rayonunda son mənzilə yola salınıb.

Şəhidimizin nəşi Ucarda böyük coşqu və izdihamla qarşılanıb, torpağa tapşırılarkən qohumları, rayon rəsmiləri və ictimaiyyət nümayəndələri iştirak ediblər.

Allah rəhmət etsin!

VAHİD FƏXRİ, UCAR