Xətai Sənət Mərkəzində növbəti rəsm sərgisi start götürür

28 May – Müstəqillik Gününə həsr olunan “Azərbaycanım” Beynəlxalq VII Uşaq və Gənc Rəsm Festivalı çərçivəsində elan olunan müsabiqənin sərgiləri baş tutacaq. Sərgilər mayın 13-dən 17-dək növbəli şəkildə Xətai Sənət Mərkəzində açılacaq. Qeyd edək ki, sərgilərdə Salyan Dövlət Rəsm Qalereyasının 18 üzvünün rəsm əsərləri də yer alıb. Bunlar Nərmin Məmmədovanın "Çiçək dənizi", Aysun Rəhimovanın "Güldanda gül", Fəridə Muradovanın "Zanbaqlar" (rəssam müəllim Coşqun Məmmədov), Lətifə Salmanovanın "Yasəmən natürmortu", Aytən Abasovanın "Yasəmən" (rəssam müəllim İman Mustafayev), Fəxriyyə Kərimovanın "Günəbaxanlar arasında", Ayşən Əliyevanın "Sarı lalə çiçəkləri", Yasəmən Əhmədovanın "Qızılgüllərin rəqsi", Aylin Əlizadənin "Orkide", Gülcənnət Əliyevanın "Yasəmənlər", Fatimə Ələkbərlinin "Baharın ətri", Məryəm Məmmədovanın "Vazada güllər" (rəssam müəllim Aynur Abbasova), Sevinc Yusifovanın "Çiçəkli qız", Tərbiyyə Gözəllinin "Bir səbət çiçək" (rəsm müəllimi Xanım Kazımova), Aysel Kərimovanın "Xarı bülbül", Almaz Əliyevanın "Qarışıq güllər", Günay Nəcəfovanın "Qızılgüllər", Sevda Tağızadənin "Güldandakı güllər" (rəsm müəllimi Ləman Axundova) əsərləridir. Adları qeyd olunan yeniyetmə və gənc rəssamların əsərləri 13, 15 və 17 may tarixli sərgilərdə saat 16:00-da nümayiş olunacaq. Bildirək ki, akvarel texnikasında və mövzusu güllər olan müsabiqəyə 2500-ə yaxın 8-21 yaş arası Azərbaycan gəncləri ilə yanaşı, Türkiyə, İran, Peru, Litva, Gürcüstan, Yaponiya, Vyetnam, Hindistan vətəndaşları da qatılıb. Sərgilərdə ümumilikdə 800-ə yaxın əsər nümayiş etdiriləcək.
“Azərbaycanım” Beynəlxalq VII Uşaq və Gənc Rəsm Festivalı Mədəniyyət Nazirliyi, Elm və Təhsil Nazirliyi, Azərbaycan Televiziya və Radio Verilişləri Qapalı Səhmdar Cəmiyyəti, Xətai Rayon İcra Hakimiyyətinin dəstəyi, Azərbaycan Rəssamlar İttifaqı, Azərbaycan Dövlət Rəsm Qalereyası, Xətai Sənət Mərkəzi, Beynəlxalq Suluboya Cəmiyyətinin Azərbaycan nümayəndəliyi və Beynəlxalq Suluboya Cəmiyyəti Xətai Uşaq Sənəti Qalereyasının təşkilatçılığı ilə keçirilir.