İdmançılarımız ABŞ-da medallar qazandılar - EKSKLÜZİV

ABŞ-da azərbaycanlı idmançılarımız ölkəmizi uğurla təmsil ediblər.

ULUSUM.az saytının ABŞ Bürosunun məlumatına əsasən, burada qaydasız döyüş növü (MMA) üzrə Avropa, Amerika və dünya çempionu Elgün Xanoğlanlı, sambo və MMA üzrə Ukrayna çempionu Teymur Həsənov qrapplinq (Grappling, No-Gi) döyüş növü üzrə yarışıblar.

Şimalı Amerika Qrapplinq Federasiyasının (NAGA) təşkil etdiyi dünya çempionatı Nyu Cersi ştatında keçirilib. Hər il ənənəvi olaraq keçirilən və 7 mindən çox idmançının qatıldığı, dünyanın ən böyük qarışıq qrapplinq turniri hesab olunan yarışda iştirakçılar fərdi, eləcə də komanda şəklində mübarizə aparıblar.

Qrapplinqdə həmyerlilərimiz - E. Xanoğlanlı 70 kq, T. Həsənov isə 100 kq çəkidə güclərini sınayıblar. Gi və No-Gi versiyaları üzrə keçirilən yarışlarda E. Xanoğlanlı gümüş və bürünc medala, T. Həsənov isə qızıl medala sahib olub. E. Xanoğlanlı yarışı ikinci, T. Həsənov isə hər üç rəqibinə qalib gələrək birinci bitirib. İdmançılarımız zəfəri üçrəngli, ay-ulduzlu Azərbaycan bayrağını dalğalandıraraq qeyd ediblər.

Qeyd edək ki, hər iki həmyerlimiz ABŞ-də keçirilən beynəlxalq idman yarışlarında tez-tez ölkəmizi layiqincə təmsil edirlər.

ULUSUM.az saytının ABŞ Bürosu
Tofiz Ağayev.