Musiqi və incəsənət məktəblərinə elektron qeydiyyat başladı

2025/2026-cı tədris ili üçün musiqi və incəsənət məktəblərinə qəbul üçün qeydiyyat 25 aprel–25 may tarixləri arasında "My Culture" platforması üzərindən aparılacaq.

Azərbaycan Respublikası Mədəniyyət Nazirliyi və Naxçıvan Muxtar Respublikası Mədəniyyət Nazirliyinin sistemindəki musiqi və incəsənət məktəblərinə ilk dəfə olaraq birgə elektron qəbul həyata keçirilir.

Təhsilalanlar, valideynləri və ya qanuni nümayəndələri fiziki olaraq məktəbə getmədən elektron şəkildə qeydiyyatdan keçə biləcəklər. Qəbul musiqi, rəssamlıq və xoreoqrafiya istiqamətləri üzrə təşkil olunacaq və müraciət edənlər həm ixtisası, həm də imtahan vermək istədikləri ərazini seçmək imkanı əldə edəcəklər.

Qəbul üçün yaş hədləri təhsil müddəti və ixtisas istiqamətlərinə uyğun müəyyən edilib. Məktəblərin I sinfinə ödənişli əsaslarla qəbul zamanı yaş həddi 29 yaşa qədərdir. Qəbul imtahanlarının vaxtı və yeri şəxsi kabinet, SMS bildiriş və elektron poçt vasitəsilə namizədlərə təqdim olunacaq.


✍️ "Ulusum".az