Sizi səssizcə yaşlandıran vərdişlər hansılardır?

Gec yatmaq, tez-tez yemək və telefona çox baxmaq – görünüşdə sadə vərdişlər, amma əslində orqanizmi tez qocaldır. Bu barədə “Gazeta.Ru”ya “Netologiya”nın “Tibb” istiqamətinin rəhbəri Yevgeni Maşkovski danışıb.

O bildirib ki, elmi baxımdan qocalma sadəcə yaşla bağlı proses deyil, bir sıra bioloji dəyişikliklərin toplusudur:

orqanizmdə iltihab,

beynin neyroplastikliyinin və idrak funksiyalarının azalması,

DNT-də zədələrin yığılması,

zülalların qlikasiyası.

Bu dəyişiklikləri analizlər və düzgün həyat tərzi ilə izləmək və yavaşlatmaq mümkündür.

🔹 Miflər

Mütəxəssis qeyd edir ki, qocalma ətrafında hələ də bir çox miflər dolaşır. Ən geniş yayılmış inanc – “anti-age” kremlərin və əlavələrin orqanizmi gəncləşdirdiyi fikridir. Halbuki kremlər yalnız dərinin görünüşünü yaxşılaşdıra bilər, dərin hüceyrə proseslərinə təsir etmir. Toz halında kollagen və müxtəlif “gənclik vitaminləri”nin də çox vaxt sübut olunmuş faydası yoxdur.

🔹 Yuxu

Pis yuxu – qocalmanı sürətləndirən ən əsas faktorlardan biridir. Gecə yarısından sonra yatmaq, telefon ekranının işığı, gec yemək və alkoqol sirkadiyalı ritmləri pozur, melatonin və kortizol balansını dəyişir. Nəticədə bədənin bərpa sürəti azalır. Çıxış yolu – vaxtında yatmaq, qaranlıq və sərin otaqda yuxuya getmək, yuxu rejiminə əməl etməkdir.

🔹 Qidalanma

Çoxlu şəkər, tez-tez yemək və az lif istifadəsi bağırsaq mikroflorasını pozur və hüceyrələri qocaldır. Ən zərərli qidalar: qazlı içkilər, şirniyyatlar, kolbasa, fastfud. Çıxış yolu – intervallı aclıq (16:8 və ya 18:6), az işlənmiş qidalar, tərəvəz, zülal və faydalı yağlar. Həmçinin omega-3, vitamin D, maqnezium və sink kimi vacib maddələrin balansına diqqət yetirmək lazımdır.

🔹 Stress

Xroniki stress hormonal sistemi pozur, insulinin tənzimlənməsini çətinləşdirir və bədənin bərpa imkanlarını zəiflədir. Nəfəs məşqləri, meditasiya və stressin monitorinqi bu problemi yüngülləşdirə bilər.

🔹 Aktivlik və Zehni Sağlamlıq

Oturaq həyat tərzi qan dövranını zəiflədir, əzələləri zəiflədir və iltihabı artırır. Çıxış yolu – həftədə 2–3 güc məşqi, müntəzəm hərəkət və stretching.
Beyin də daim məşq tələb edir: öyrənmək, meditasiya, intellektual oyunlar, yeni bacarıqlar qazanmaq (məsələn, dil öyrənmək və ya musiqi aləti ifa etmək) qocalmanı ləngidir.

Ulusum.az