Baş ağrılarının gizli səbəbi?...

Daimi, küt və basqılı baş ağrılarının səbəbi bəzən yorğunluq və ya miqren deyil, tamamilə başqa amillərlə bağlı ola bilər. Eurokappa Academy spikeri, ortodont həkim İrina Didenkonun sözlərinə görə, belə ağrıların az öyrənilmiş səbəblərindən biri çeynəmə əzələlərinin hipertonusudur. Bu vəziyyət çox vaxt səhv diş qapanışı (dişlərin düzgün düzülməməsi) nəticəsində yaranır.

🔹 Necə baş verir?

Qapanış pozulduqda çənə və dişlərə düşən yük bərabər paylanmır. Nəticədə çeynəmə əzələləri həddindən artıq gərginləşir, xroniki spazm yaranır və bu da başda uzunmüddətli ağrıya gətirib çıxarır. Xəstələr çox vaxt gicgah və ya ənsə nahiyəsində basqılı ağrı, başda ağırlıq və keçməyən yorğunluqdan şikayətlənirlər.

🔹 Əlamətlərə diqqət et

diş minasının tez aşınması,

çənə oynaqlarında çırtlama və ya xırıltı,

çeynəmədə çətinlik,

üz və boyun nahiyəsində ağrı,

uzun danışıq və ya yeməkdən sonra “çənə yorğunluğu” hissi.

🔹 Buruq dişlərin gizli təhlükəsi – bruksizm

Səhv qapanış çox vaxt bruksizmə səbəb olur – yuxuda diş sıxmaq və ya dişləri qıcırtmaq. Bu, səhər baş ağrısı, halsızlıq, həm də dişlərdə çatlar və həssaslıqla nəticələnə bilər.

🔹 Həll yolu nədir?

Problemi yalnız dərmanlarla deyil, ortodontik müalicə ilə həll etmək olar:

breketlər,

müasir şəffaf elaynerlər.

Elaynerlər həm əzələlərin gərginliyini azaldır, həm də dişlərin aşınmasının qarşısını alır. Pasiyentlər çox vaxt təəccüblənirlər ki, qapanış düzəldildikdən sonra yalnız gülümsəmələri deyil, həm də baş ağrıları, yuxu və ümumi vəziyyətləri normallaşır.

🔹 Vacib xəbərdarlıq

Əgər sizdə mütəmadi baş ağrıları, diş qıcırtısı, səhər yorğunluğu və ya çənədə ağrılar varsa, mütləq ortodonta müraciət edin. Doğru diaqnoz və kompleks müalicə yalnız simptomları deyil, problemin əsas səbəbini aradan qaldıracaq.

Ulusum.az