Qırışları tezləşdirən 5 gündəlik vərdiş

Üzdə qırışların yaranmasını ləngitmək üçün düzgün dəriyə qulluq vacibdir. Amma bundan az önəmli olmayan məsələ gündəlik vərdişlərdən uzaq durmaqdır, çünki onlar bu prosesi sürətləndirə bilər. “Qazeta.ru”ya danışan “SM-Kosmetologiya” klinikasının həkim-kosmetoloqu Yana Katina qırışların vaxtından əvvəl yaranmasına səbəb olan 5 vərdişi sadalayıb.

1. Günəşdən qorunmamaq

Kosmetoloqa görə, qırışların əsas səbəblərindən biri ultrabənövşəyi şüalardır (UVA və UVB). Onlar dəridə kollagen və elastini məhv edir, fotoyaşlanma – dərin qırışlar, ləkələr, quruluq və tonusun itməsi yaradır. Günəşdən qorunma yalnız yayda deyil, hər gün vacibdir. Həkim 365 gün boyunca SPF 30+ (ideal olaraq 50+) kremlərdən istifadənin mütləq olduğunu vurğulayır – hətta maşında və ya ofisdə pəncərə yanında oturarkən belə.

2. Üz üstə və ya yanda yatmaq

Gecə boyu üzün yastığa sıxılması dərini “bükür” və zamanla qalıcı qırışlara çevirir. Bunlar xüsusən alın, yanaq və dekolte nahiyəsində görünür. Həkim arxası üstə yatmağı, ipək və ya atlas üzlüklü yastıq istifadəsini, eləcə də ortopedik yastıqları məsləhət görür.

3. Çox mimika və gözləri qıymaq

Həddindən artıq mimika – günəşdə və ya eynəksiz gözləri qıymaq, alnı yığmaq – dərin mimik qırışlara (“qazayağı”, qaşarası, alında xətlər) səbəb olur. Bunun qarşısı üçün UV filtri olan gün eynəklər taxmaq, üz ifadəsini idarə etmək, lazım olduqda oftalmoloqa müraciət etmək və ya botulinoterapiyadan istifadə etmək məsləhətdir.

4. Dərini düzgün təmizləməmək

Kosmetoloq qeyd edir ki, makiyajla yatmaq və ya aqressiv təmizləyicilər (spirtli toniklər, sərt skrablar) istifadə etmək dərinin qoruyucu baryerini zədələyir. Bu isə quruluq, iltihab və sürətli qırışlanmaya gətirib çıxarır. Ən doğru üsul iki mərhələli təmizləmədir: əvvəl makiyajı micellar suyu/yağ/balzamla silmək, sonra yumşaq köpük və ya gel ilə yumaq. Ardınca tonik, nəmləndirici və qidalandırıcı krem tətbiq olunmalıdır.

5. Siqaret və alkoqol

Siqaret və alkoqol dərinin vəziyyətinə ən çox zərər vuran amillərdəndir. Siqareti tərgitmək mümkün deyilsə, əlavə qulluq tədbirləri vacibdir: antioksidant serumlar (C vitamini), nəmləndirmə, kollagen stimulyatorları (retinol, peptidlər – yalnız kosmetoloqla məsləhətləşdikdən sonra).

Ulusum.az