Böyrək daşlarına qarşı təbii müdafiə

İnsanın qidalanması birbaşa böyrəklərin sağlamlığına, xüsusilə daşların əmələ gəlməsi prosesinə təsir edir. Bəzi qidalar onların yaranmasına səbəb ola bilər, digərləri isə əksinə – profilaktik təsir göstərir. Həkim-nefroloq Tanzila Saqova “Gazeta.Ru”ya hansı məhsulların sidikdə daş əmələ gəlməsi riskini azaltdığını izah edib.

Mütəxəssisin sözlərinə görə, böyrək daşlarına qarşı ən effektiv “müdafiəçilərdən” biri sitrus meyvələridir – limon, laym, portağal. Bu meyvələrin tərkibində yüksək miqdarda limon turşusu olur ki, bu da sidiyin pH səviyyəsini artırır və duzların kristallaşmasının qarşısını alır.

Saqova vurğulayıb ki, digər vacib qida elementi – qida lifidir. Lif qan şəkərini tənzimləməyə və maddələr mübadiləsini normada saxlamağa kömək edir. Buna görə də həkim gündəlik rasiona liflə zəngin təzə meyvə və tərəvəzləri daxil etməyi tövsiyə edir.



Az yağlı süd məhsulları da vacib rol oynayır. Nefroloqun sözlərinə görə, onların tərkibindəki kalsium bağırsaqda oksalatlarla birləşir və onların qana, oradan da sidiyə düşməsinin qarşısını alır. Bu isə oksalat daşlarının yaranma riskini əhəmiyyətli dərəcədə azaldır.

Saqova həmçinin az yağlı zülal mənbələrinə – toyuq, balıq, yumurtaya üstünlük verilməsini tövsiyə edib. Bunlar, qırmızı ətlə və içalatla müqayisədə, daha az purin tərkiblidir və sidik turşusu daşlarının yaranma riskini azaldır.

Həkim su balansının qorunmasının da vacib olduğunu vurğulayıb. Böyük tədqiqatlar göstərib ki, gündə 1,5 litrdən az su içən insanlarda böyrək daşları əmələ gəlmə ehtimalı gündə 2,5 litrdən çox su içənlərlə müqayisədə 1,5 dəfə yüksəkdir.

Sonda nefroloq hansı məhsulları məhdudlaşdırmaq lazım olduğunu da xatırladıb. Bunlara yüksək oksalat tərkibli tərəvəzlər (ispanaq, rəndə, çuğundur), artıq duz və purinlə zəngin məhsullar (qırmızı ət, bəzi dəniz məhsulları və içalatlar) daxildir.



Ulusum.az