6-08-2025, 19:00 0 Sağlamlıq

İstidə baş ağrısının səbəbi?...

İsti havalarda baş ağrısı çox zaman orqanizmin susuz qalması (dehidratasiya) səbəbindən yaranır. Bu problemdən xilas olmaq üçün yetərli miqdarda maye qəbul etmək kifayətdir. Bu barədə "Газета.Ru"ya Piroqov Universitetinin Neyroelmlər və Neyrotexnologiyalar İnstitutunun dosenti, nevroloq Nataliya Suvorinova məlumat verib.

“İstidə baş ağrısının əsas səbəblərindən biri susuzlaşmadır. Bunu önləmək üçün gün ərzində qəbul edilən maye miqdarını artırmaq lazımdır. Baş ağrısı zamanı ağrıkəsici qəbul edib sakit vəziyyətdə qalmaq tövsiyə olunur. Baş ağrısının qarşısını almağın əsas yolları isə gündəlik rejimə riayət etmək, yaxşı yuxu, sağlam qidalanma və fiziki aktivlikdir,” – deyə həkim bildirib.

Susuzlaşma həmçinin miqrenin yayılmış səbəblərindən biridir. Bundan əlavə, bu vəziyyət gərginlik tipli baş ağrılarının yaranmasına da səbəb ola bilər. Belə ağrılar adətən ibuprofen kimi qeyri-steroid iltihabəleyhinə dərmanlarla aradan qaldırılır.

“Susuzlaşmanın miqren və ya gərginlik tipli baş ağrılarını niyə tetikləmiş ola biləcəyi hələ dəqiq məlum deyil. Miqren zamanı ağrı güclü olur, parlaq işıq və səslərə qarşı dözümsüzlük, ürəkbulanma, bəzən qusma müşahidə olunur ki, bu da bəzən yüngülləşməyə səbəb olur. Həmçinin, fiziki hərəkətlər – məsələn, adi gəzinti belə – vəziyyəti daha da ağırlaşdıra bilər. Miqren tutmaları adətən 2 saatdan 72 saata qədər davam edir. Müalicədə triptanlar və 12 yaşdan yuxarı uşaqlar və böyüklər üçün təsdiqlənmiş monoklonal anticisimlər istifadə olunur,” – deyə həkim əlavə edib.

Daimi və ya tez-tez təkrarlanan baş ağrılarında müayinə və müalicə taktikası nevroloq tərəfindən təyin olunur. Lazım gəldikdə baş və boyun damarlarının doppleroqrafiyası, göz dibi müayinəsi, ümumi qan analizi, eləcə də EEQ və ya MRT təyin edilə bilər.

Ulusum.az

Diqqət Çəkənlər