Darçının Həddindən Artıq İstifadəsi Dərmanların Təsirini Azalda Bilər!

Darçının həddindən artıq istifadəsi reseptlə yazılan dərmanların orqanizmdən sürətlə xaric olunmasına və onların effektivliyinin azalmasına səbəb ola bilər. Bu barədə Missisipi Universitetinin Təbii Məhsullar üzrə Milli Tədqiqat Mərkəzinin baş alimi Şabana Xan məlumat verib. Onun sözlərini Daily Mail nəşri yayıb.

Alimin sözlərinə görə, darçın bir çox yemək və içkinin — kofedən tutmuş şorbaya qədər — tərkibində geniş yayılmış bir inqrediyentdir. Lakin bu ədviyyatla ehtiyatlı olmaq, daimi olaraq hər hansı dərman qəbul edən insanlar üçün xüsusilə vacibdir. Məlum olub ki, darçın azı 47 müxtəlif dərmanın mənimsənilməsinə təsir edir. Bu dərmanlara şəkərli diabet, artrit, astma, İİV, SPİD və depressiyaya qarşı preparatlar daxildir.

Xan izah edir ki, darçının tərkibində ona özünəməxsus dad və qoxu verən “darçın aldehidi” adlı bir birləşmə var. Bu maddə, həmçinin, bədəndə dərmanların daha sürətli parçalanmasına səbəb olan reseptorları aktivləşdirir ki, bu da onların təsirini azalda bilər.



Missisipi Universitetinin alimləri əlavə edirlər ki, darçın həm də qanı durulaşdıran yüksək miqdarda kumarin maddəsi ehtiva edir. Bu ədviyyatın həddən artıq istifadəsi, artıq antikoaqulyant (qan durulaşdırıcı) qəbul edən insanlarda qanaxma riskini artıra bilər.

Tədqiqatçılar hesab edirlər ki, darçın çox daha geniş spektrdə dərmanlarla qarşılıqlı təsirə girə bilər. Lakin bunu dəqiqləşdirmək üçün əlavə elmi araşdırmalara ehtiyac var.

✍️"Ulusum".az