Sağlam görünən, amma kökəldən qidalar – dietoloqdan xəbərdarlıq

“Gazeta.Ru”ya danışan dietoloq Yelena Ustinova bəzi məhsulların sağlam hesab edilsə də, əslində çəki artımına səbəb olduğunu bildirib. Bu “aldadıcı sağlam” qidalar sırasında rollar, meyvə şirələri və səhər yeməkləri ön sıralardadır.

Ustinovanın sözlərinə görə, amerikan üslubunda hazırlanmış suşi rollarının əsas tərkibi düyüdür, bu isə çoxlu karbohidrat və kalori deməkdir. Məsələn, “Filadelfiya” və ya “Kaliforniya” rolunun 250 qramlıq porsiyası təxminən 500 kalori ehtiva edir. Dietoloq bu tip yeməkləri yalnız günün birinci yarısında qəbul etməyi tövsiyə edir.

İkinci “təhlükəli sağlam” məhsul – meyvə şirələridir. Onlar tərkibində çox miqdarda şəkər saxlayır: 100 ml-də təxminən 10–15 qram şəkər (2–3 çay qaşığı), yəni bir stəkan şirədə 10-a qədər qaşıq şəkər ola bilər.

Dondurulmuş smuzilərə də diqqət yetirmək lazımdır, deyə həkim əlavə edir. Onların tərkibi faydalı olsa da, şəkər miqdarı yüksək olduğu üçün çəki artımına səbəb ola bilər.

Üçüncü kateqoriya isə səhər yeməkləri – müsli, qarğıdalı lopaları və granoladır. Ustinovanın dediyinə görə, xüsusilə balda qovrulmuş dənli bitkilər və çoxlu qoz-fındıqla zəngin granolalar da arıqlamaq istəyənlər üçün təhlükəli ola bilər.

✍️"Ulusum".az