Yeni Klinikada alman mütəxəssislərin iştirakı ilə tibbi təlimlərə start verildi

TƏBİB və Yeni Klinika ilə Almaniyanın tanınmış səhiyyə idarəetmə qurumları olan “Falk Beratung” və “Sana Hospital Group” arasında imzalanmış əməkdaşlıq müqaviləsinə əsasən, Yeni Klinikada tibbi personal üçün təlimlərə start verilib.




Təlimlərin ilk mərhələsində 12 həkim və 60 tibb bacısı “xəstəyə qulluq və tibb bacısı xidmətinin dəstəklənməsi” modulu üzrə təlimlərdə iştirak edib. Almaniyadan dəvət olunan yüksək ixtisaslı mütəxəssislər – “Sana” klinikasının Tibb bacısı akademiyasının direktoru Jörg Noll, terapiya və xidmət komandalarının üzvləri Reinhold Angerer, İndat Tas və Marie Beinert tərəfindən nəzəri və praktiki biliklər təqdim olunub.



Sessiyalarda “pasiyent yolu”na dair müxtəlif mərhələlər – poliklinik müayinə, planlı cərrahi və konservativ müalicə, təcili qəbul və sonrakı mərhələlər üzrə müasir yanaşmalar tədris olunub. Təlimlərdən öncə TƏBİB və “Sana”nın nümayəndələri klinikanın iş prinsiplərini analiz edərək, təlim ehtiyaclarına uyğun xüsusi proqram hazırlayıblar.



Bu təlimlər ölkəmizdə tibbi xidmət keyfiyyətinin artırılması və beynəlxalq standartlara uyğunlaşdırılması baxımından mühüm əhəmiyyət daşıyır.



✍️ "Ulusum".az