Soyuducu pomidorlara niyə "düşmən" kəsilir?

Pomidorları soyuducuda saxlamaq onların dadına və keyfiyyətinə mənfi təsir edir. Aqronomların “Vechernyaya Moskva”ya verdiyi məlumata görə, soyuqda saxlanılan pomidorlar “plastik” dad alır, şirəsi və ətri isə itir. Ən uyğun temperatur otaq şəraitidir (təxminən +22°C).

Plastik paketlərdən istifadə etmək də düzgün deyil — bu, istixana effekti yaradır və tez xarab olmağa səbəb olur. Aqronomlar bunun əvəzinə kağız döşəkçəli səbətlər və ya taxta qutulardan istifadə etməyi tövsiyə edir. Pomidorları saplağı aşağı olmaqla düzərək saxlamaq, onların yumşalmasının qarşısını ala bilər.

Əlavə olaraq, pomidorları əvvəlcədən yumaq olmaz — bu, çürüməni sürətləndirir. Ən yaxşısı, onları yeməkdən dərhal əvvəl yumaqdır. Günəş şüaları da birbaşa meyvələrə düşməməlidir.

Amma ən vacibi — mütəmadi olaraq pomidor ehtiyatlarınızı yoxlayın. Çünki bir xarab pomidor digərlərini də korlaya bilər.

Ulusum.az