İngiltərədə uşaqlıq transplantasiyası ilə ilk körpə doğulub - Foto

İngiltərədə uğurlu uşaqlıq transplantasiyası əməliyyatı nəticəsində ilk körpə sağlam şəkildə dünyaya gəlib. Bu, həm də İngiltərədə donor bətnindən istifadə edən ilk ana tərəfindən dünyaya gətirilən körpə olub.

Körpənin adı Amy olaraq qoyulub və o, 36 yaşlı Qreys Devidsonun uşaqlıq transplantasiyası nəticəsində dünyaya gəlib. Qreys, Mayer-Rokitanski-Küster-Hauzer (MRKH) sindromu ilə doğulub. Bu nadir xəstəlik, uşaqlıq yolunun olmaması və ya inkişaf etməməsi ilə xarakterizə olunur, amma yumurtalıqlar işləyir və normal hormon funksiyası mövcuddur.

Qreys, 2023-cü ildə bacısından aldığı donor uşaqlığı ilə həyata keçirilən bu transplantasiya əməliyyatından sonra dünyaya körpə gətirmək imkanı qazanıb. Uşaqlıq transplantasiyası, əvvəllər 2019-cu ilin sonunda həyata keçirilməsi planlaşdırılsa da, COVID-19 pandemiyası səbəbindən bir neçə il təxirə salınmışdı. 2023-cü ilin fevralında, 30-dan çox tibb işçisindən ibarət bir komanda, Qreysin bədəninə Aminin uşaqlığını köçürmək üçün təxminən 17 saatlıq mürəkkəb bir əməliyyat keçirib.

Qreys və əri Anqus, uşaqlıq donorunu — Qreysin bacısı Amini — əbədilik xatırlamaq məqsədilə, yeni doğulan qızlarına Aminin adını veriblər. Körpə Emi İzabel Londondakı Queen Charlotte's and Chelsea Xəstəxanasında dünyaya gəlib.

İlk dəfə 2014-cü ildə İsveçdə uşaqlıq transplantasiyası ilə dünyaya gələn körpə, bu sahədəki ilk uğurlu nəticə olmuşdu. O vaxtdan etibarən ABŞ, Çin, Fransa, Almaniya, Hindistan və Türkiyə kimi müxtəlif ölkələrdə 135-ə yaxın uşaqlıq transplantasiyası əməliyyatı həyata keçirilib. Bu əməliyyatlar nəticəsində təxminən 65 körpə sağlam şəkildə dünyaya gəlib.