Mövsümsüz qarpız təhlükəsi - Ekspert Danışır

Hazırda ölkəmizdə qarpız mövsümü olmasa da, vətəndaşlar arasında bu məhsuldan alıb yeyənlər kifayət qədərdir. Qida ekspertləri isə deyirlər ki, mövsümdən öncə bu bostan bitkisini alıb istehlak etmək bəzən insan həyatına mənfi təsir göstərir. Zəhərlənənlər, hətta həyatını itirənlər olur. Elə iyunun 7-də 20 yaşlı gənc Dərya Ağayevanın məhz qarpızdan zəhərlənərək həyatını itirdiyi bildirilir.

"Bu il Azərbaycana qarpız İran və Brazilyadan idxal olunub"

Modern.az-a açıqlamasında iqtisadçı ekspert Akif Nəsirli bildirib ki, Azərbaycan qarpız yetişdirən ölkədir:

"Azərbaycan hər il yay mövsümündə orta hesabla 8-9 min ton qarpızı MDB ölkələrinə ixrac edir. Amma Azərbaycana qarpız idxalı da kifayət qədərdir. Ölkəmizə qarpız idxalı qış və erkən yazda edilir. Əsasən İrandan idxal olunur. Bu il qarpız İran və Brazilyadan idxal olunub. Bu məhsulu istixana şəraitində yetişdirmək olar. Amma buna xərc çox gedir. Azərbaycanda qazın, işığın qiyməti çox yüksəkdir. İranda dizel yanacağının bir litri 2 qəpik, Azərbyacanda isə 1 manatdır. İşıq və qaz da eyni dərəcədə olmasa da, Azrbaycanda İrana nisbətən bahadır. Məsələn, bizdə qazın qiyməti 13,5 qəpikdən başlayır, İranda isə bu 4 qəpik ətrafında limitlənir. Ona görə də istixana məhsulları Azərbaycana nisbətən İranda ucuz başa gəlir. Sahibkarlar da burada istixana qarpızı yetişdirməkdənsə, onu İrandan idxal etməyə üstünlük verirlər. Bu da məsələnin bir tərəfidir".


"Lazım gələndə qarpız idxalına məhdudiyyət qoyulur"

"Qarpız Azərbaycanda populyar tərəvəzdir, bostan bitkisidir. Onun idxalı artırsa, daxili tələbata uyğun qarpız idxalına vergi, rüsum, kvota tətbi etmək olar. Bunu bazarla əlaqələndirmək lazımdır. Təhlillər aparılmalıdır ki, doğrudanmı bazarda kifayət qədər qarpız var və bu məhsulun idxalı yerli məhsulun rəqabət gücünü aşağı salır? Belə hir tendensiya hiss olunarsa, dərhal hökumət qarpızın və digər məhsulun idxalını nəzərdən keçirir və müəyyən tədbirlər görülür. Bunlar şəraitə, bazarın vəziyyətinə uyğun olur. Buna yəqin ki, hökumət nəzarət edir və lazım gələndə bu addımları atır", - ekspert bildirib.

Ulusum.az