Türkiyə limon ixracına qadağa tətbiq etmək fikrini dəyişir

Türkiyə hakimiyyəti ixracatçılar və fermerlərlə görüşdükdən sonra limon ixracını qadağan etmək planlarından imtina etmək qərarına gəlib.

“Ulusum”.az Gazeta.ru-ya istinadən xəbər verir ki, bu barədə ticarət naziri Ömər Bolat X sosial şəbəkəsindəki səhifəsində məlumat verib.

“Görüşdə biz müzakirə iştirakçıları ilə razılaşdıq ki, vətəndaşların münasib qiymətə məhsullara çıxışını təmin etmək üçün möhtəkirliyə yol verilməyəcək, qiymətlər sabit saxlanılacaq... bununla bağlı limonun ixracına qoyulan müvəqqəti qadağa aradan qaldırılıb”, - Bolat bildirib.

Onun sözlərinə görə, Türkiyə tərəfi limon qiymətlərinə nəzarəti davam etdirəcək, alıcılara, fermerlərə və ixracatçılara diqqət yetirəcək.

Türkiyənin Ticarət Nazirliyi dünən bildirib ki, soyuq hava ilə əlaqədar və daxili tələbatı ödəmək üçün limon ixracını dayandırmağı planlaşdırır.