DİN Salyanda narkotik tərkibli bitkilər yetişdirən şəxslər saxlanılıb

Salyan Rayon Polis Şöbəsinin əməkdaşları tərəfindən keçirilən əməliyyat tədbirləri nəticəsində narkotik tərkibli bitkilərin kultivasiyası ilə məşğul olan şəxslər saxlanılıb.

Daxili İşlər Nazirliyinin Mətbuat Xidmətinin Şirvan regional qrupundan verilən məlumata görə, əməliyyat zamanı Aşağı Kürkənd kənd sakinləri Cəlal Əkbərov və Namid Əsgərovun yaşadıqları ünvanlara baxış keçirilib.

Əkbərovun həyətindən 1 kiloqram 630 qram marixuana və 9 kiloqram yaş çəkidə 8 ədəd çətənə bitkisi, Əsgərovun həyətindən isə 200 qrama yaxın marixuana və 7 kiloqram yaş çəkidə 10 ədəd çətənə bitkisi aşkarlanaraq maddi sübut kimi götürülüb.

Saxlanılan şəxslər narkotiklərin kultivasiyası ilə məşğul olduqlarını etiraf ediblər. Faktlarla bağlı Salyan Rayon Polis Şöbəsində cinayət işi başlanılıb, araşdırmalar davam etdirilir.

✍️"Ulusum".az