Doğuşdan sonra sağalmanı çətinləşdirən amillər

Doğuşdan sonrakı dövr hər bir ana üçün fərqli ola bilən bir prosesdir və bəzən sağalma gözləniləndən daha uzun çəkə bilər.

Ulusum.az xəbər verir ki, doğuşdan sonrakı dövr bəzi qadınlar üçün digərlərinə nisbətən daha çətin ola bilər. Bu çətinliklərin tibbi səbəbləri ola bilsə də, sosial və psixoloji amillər də yeni doğulmuş körpə ilə yeni həyata uyğunlaşma prosesini gecikdirə bilər.

Doğuşdan sonrakı dövrü

çətinləşdirən amilləri başa düşmək sağalma prosesində daha səbirli və şəfqətli olmağı asanlaşdıra bilər:

Çətin doğuş

Bəzi doğuşlar gözlənildiyindən daha asan gedir, digərləri isə nə qədər yaxşı hazırlaşsanız da, olduqca çətin ola bilər. Vaginal doğum zamanı tətbiq edilən tibbi müdaxilələr, həmçinin keysəriyyə əməliyyatı da doğuşdan sonrakı sağalma prosesinə mənfi təsir edən faktorlara çevrilə bilər.

Doğuş zamanı fiziki və emosional çətinlik yaşamaq bir nöqtəyə qədər normal sayıla bilər, lakin bəzi hallarda doğum zamanı baş verənlər gözləniləndən daha çox yara izi buraxır.

Doğuşa təsirli hazırlaşmaq, qərarlarına və iş birliyinə etibar etdiyiniz doğum komandası ilə işləmək, doğum zamanı fasiləsiz emosional və fiziki dəstək almaq, doğuşun təbii çətinliklərinin travmaya çevrilməsinin qarşısını almağı asanlaşdıra bilər.

Tibbi səbəblər

Sağlam və normal doğuşdan sonra daha az rast gəlinsə də, doğuşdan sonra yaranan tibbi ağırlaşmalar bir çox analara təsir edə bilər. Əvvəlki xəstəliklər, döş xəstəlikləri, hemoroid və qəbzlik kimi vəziyyətlər doğuşdan sonrakı dövrü çətinləşdirən tibbi vəziyyətlərdir.

İkinci və ya üçüncü doğuş

Məlumdur ki, ilk dəfə doğum edən qadınlarda doğuşdan sonra sağalma müddəti bir qədər qısa çəkə bilər. Ancaq ikinci və ya sonrakı hamiləliklərdə həm yaşın irəliləməsi, həm də orqanizmin ikinci dəfə hamiləlik keçirməsi səbəbindən bu, fiziki cəhətdən bir qədər çətinləşə bilər.

Kifayət qədər dəstək almamaq

Afrikalıların atalar sözü var: “uşaq böyütmək üçün bir kənd lazımdır”. Hamiləlik zamanı və sonrasında ətrafdan alınan dəstək həm ananın, həm də körpənin sağlamlığı üçün çox əhəmiyyətlidir. Doğuşdan sonra gündəlik tapşırıqlar, özünə qulluq və körpə baxımı üçün dəstək ala bilməyən qadınlar üçün doğumdan sonrakı dövr dəstək ala bilən analarla müqayisədə bir az daha çətin ola bilər.

Evdəki digər uşaqlar

“Körpə yatanda sən də yat” təklifi yalnız evdə başqa uşaqları olmayan doğuşdan sonrakı qadınlar üçün ağlabatan bir təklifdir. Evdə bir və ya bir neçə uşağı olan ailələrin gündəlik iş rejimi bir az daha yorucudur və ailəyə yeni körpənin əlavə olunması, doğuşdan sonrakı sağalma dövründə yeni anaya istirahət etmək üçün lazım olan vaxtı verməyə bilər.

Doğuşdan sonra sağalmanı dəstəkləmək üçün nə etməli?
Həyat şərtləri, sağlamlığınız və ya doğum tarixçəniz doğuşdan sonrakı dövrünüzü çətinləşdirəcək bəzi amilləri ehtiva edə bilər. Bununla belə, kifayət qədər dəstək alaraq və perspektivinizi bir az dəyişdirərək bu prosesi bir az da asanlaşdıra bilərsiniz.

Ətrafınızdakılardan dəstək istəməkdən çəkinməyin. Qonşuluq və ailə bağları keçmişdəki kimi güclü olmasa da, ətrafınızda olan, sizə dəstək ola biləcəyini bildiyiniz insanlardan kömək istəmək həm sizin, həm də körpənizin sağlamlığı üçün faydalı olacaq.

Uzun gəzintilər üçün vaxtınız və enerjiniz olmasa belə, mütləq təmiz havaya çıxın. Sevdiyiniz şeyləri etmək və sizi xoşbəxt etmək üçün vaxt tapa bilməyəcəyinizi düşünə bilərsiniz, amma hər kəs əlindən gələni etməyə çalışır.

Yuxu və istirahətinizə diqqət edin. Tam sağalana qədər hər fürsətdə dincəlmək normal vəziyyətə qayıtmağınız üçün lazım olan vaxtı qısaldır.

Həkim təyinatlarına laqeyd yanaşmayın. Bərpa prosesini izləmək həm fiziki sağlamlığınız, həm də psixoloji durumunuz üçün vacibdir. Bütün prosesi və hər hansı narahatlığınızı həkiminizlə paylaşın. Güclü psixoloji narahatlıq yaşayırsınızsa, xüsusilə hamiləlik və doğuşdan sonrakı proseslərlə işləyən bir psixoloqa müraciət edin.
Aymirə Ağamirova