Şimal-qərb bölgəsində qeyri-sabit hava şəraiti bir sıra fəsadlar törətdi

Şimal-qərb bölgəsində qeyri-sabit hava şəraiti bir-sıra fəsadlar törədib.

Ulusum.az-ın məlumatına görə, axşam saat 20 radələrindən başlayaraq ölkənin şimal-qərb bölgəsində qeyri-sabit hava şəraiti hökm sürür.

Balakən, Zaqatala, Qax və Oğuz rayonlarının ərazilərində güclü külək əsib, qısa müddətli leysan yağışı yağıb. Güclü külək səbəbilə axşam saat 21 radələrindən Balakən rayon mərkəzinə və ətraf yaşayış məntəqələrinə elektrik enerjisinin verilməsində fasilələr yaranıb.

Hazırda Balakən rayon Paylayıcı Elektrik Şəbəkəsinin əməkdaşları ərazilərdə elektrik enerjisinin verilməsində yaranan fasilənin aradan qaldırılması istiqamətində işlər aparır.

Axşam saatlarında güclü külək Qax rayonunun bir-neçə yaşayış məntəqəsində də elektrik enerjisinin verilməsində qısa müddətli fasilə yaradıb. Rayonun Turaclı kəndi istiqamətində yol kənarında ağac aşıb.

Axşam saatlarında Oğuz rayonunda əsən güclü külək səbəbilə Oğuz- Bayan avtomobil yolunun kənarındakı ağaclar aşıb, yolda avtomobillərin hərəkətində bir müddət fasilə yaranıb. Aidiyyatı qumların müdaxiləsindən sonra aşan ağaclar yoldan götürülüb, hərəkət yenidən bərpa olunub.

Hazırda şimal-qərb bölgəsində qeyri-sabit hava şəraiti davam edir.