“Xoşbəxtəm ki, Ulu Öndərin qarşısında çıxış etmək nəsib oldu” EKSKLÜZİV

“Xoşbəxtəm ki, ulu öndərin qarşısında çıxış etmək nəsib oldu”.

Əməkdar artist, Azərbaycan Dövlət Akademik Musiqili Teatrının aktyoru, televiziya aparıcısı Əkbər Əlizadə Ümummilli lider Heydər Əliyevlə bağlı xatirələrini Ulusum.az saytı ilə bölüşüb.

“1994-cü ildə Mədəniyyət və İncəsənət Universitetinə daxil olduğum ildə indiki H.Əliyev sarayında BMT-nin tədbiri baş tutacaqdı. Konsertdə bir çox xarici dillərlə yanaşı, Azərbaycan dilində də danışılmalı idi. Ustad Pedaqoqum Cənnət Səlimova öz dilimizdə təqdimat üçün məni tövsiyə etdi. Xoşbəxtəm ki, bəyənildim və ilk dəfə ulu öndərin qarşısında çıxış etmək mənə nəsib oldu. Sonradan daimi olaraq 2002-ci ilə kimi əhəmiyyətli dövlət tədbirlərində aparıcılıq etmişəm. Ümummilli Liderin iştirak etdiyi tamaşalarda rol almışam. Dəfələrlə kulis arxasında konsertdən, tamaşadan sonra dahi şəxsiyyətin təhlilini dinləməkdən xüsusi zövq alırdıq".

Əməkdar artist qeyd edib ki, Ulu öndərin irsi, tövsiyələri bugünkü günümüzdə yaşayır. Dövlətimizin başçısı cənab İlham Əliyevin dahi şəxsiyyətin ənənələrini, siyasətini uğurla davam etməsinə diqqət çəkən əməkdar artist cənab Prezidentin bununla xalqın etimadını, sevgisini qazandığını vurğulayıb.

"Ulu öndərin təsis etdiyi "Prezidet mükafatı" və Prezident təqaüdü ənənəsini dövlət başçımız bu gün də davam etdirməklə neçə-neçə incəsənət xadiminə mənəvi və maddi dəstək olur. Mayın 9-u möhtərəm prezident İlham Əliyevin mükafatına mən də layiq görüldüm. Teatr və səhnə fəaliyyətimi yüksək qiymətləndirdiyi üçün prezidentim cənab İlham Əliyevə xüsusi təşəkkürümü və minnətdarlığımı bildirirəm.
Allah ulu öndərimiz Heydər Əliyevə rəhmət eləsin, cənab Prezident İlham Əliyevə və ailəsinə can sağlığı versin”.

Ağa Dadaşzadə