Rektorluqdan azad edilən Şahin Əliyev: o da Ramiz Mehdiyevi tərifləmişdi Rektorluqdan azad edilən Şahin Əliyev: o da Ramiz Mehdiyevi tərifləmişdi

Prezident İlham Əliyevin dekabrın 10-da imzaladığı sərəncamla Şahin Əliyev Ədliyyə Nazirliyinin Ədliyyə Akademiyasının rektoru vəzifəsindən azad edilib.

Ulusum.az-ın məlumatına görə, rektor vəzifəsi ilə vidalaşan Şahin Əliyev uzun illər Prezident Administrasiyasında çalışıb. O, 1991–2022-ci illərdə Hüquq ekspertizası şöbəsinin müdiri olub. 2022-ci ildə şöbə ləğv edildikdən sonra 19 may 2022-də Ədliyyə Akademiyasının rektoru təyin edilib.

Məlumatlara görə, Şahin Əliyev Prezident Administrasiyasının sabiq rəhbəri Ramiz Mehdiyevə yaxın kadr kimi tanınıb. Sosial şəbəkələrdə yayılan videoda onun Ramiz Mehdiyevi yüksək tərifləməsi geniş müzakirələrə səbəb olub.

Şahin Məhərrəm oğlu Əliyev 1960-cı ildə Bakıda anadan olub, Daşkənd Dövlət Universitetinin məzunudur. 1984-cü ildən Elmlər Akademiyasında, daha sonra ADU-da müəllim kimi çalışıb. 1989-cu ildən dövlət qulluğunda müxtəlif rəhbər vəzifələrdə olub və eyni ildə Prezident Aparatına şöbə müdiri təyin edilib.

Hüquq elmləri namizədidir. 2020-ci ildə dövlət qulluğunda uzunmüddətli fəaliyyətinə görə “Şöhrət” ordeni ilə təltif olunub.